मुख्यमंत्री भजन लाल शर्मा री अगुवाई मांय दीतवार ने राज्य कैबिनेट री बैठक राख्यी गयी। बैठक मांय न्यारा-न्यारा कर्मचारी कैडर री सेवा नियमां मांय फेरबदल समेत केई फैसला लिया गया। कैबिनेट बैठक मांय लिया गया फैसला री जाणकारी देता थकां उपमुख्यमंत्री दिया कुमारी अर विधि मंत्री जोगाराम पटेल बताया के चतुर्थ श्रेणी कर्मचारी भर्ती नियमां मांय शैक्षणिक योग्यता मांय बदलाव करबा रे पछे अबे 10वीं पास अभ्यर्थी ही आवेदन कर सकेला। प्रदेश मांय चतुर्थ श्रेणी कर्मचारियां री भर्ती आवता दो वरसा मांय लिखित परीक्षा रे जरिये करी जावेला। या भर्ती परीक्षा राज्य कर्मचारी चयन बोर्ड री कानी ऊं राख्यी जावेला। श्री पटेल बताया के ऊर्जा रा हलकां मांय प्रदेश ने आत्मनिर्भर बणावा री कोशिश करी जा री है। इण कडी मांय सौर ऊर्जा उत्पादन खातर हाल तांई 10 हजार 4 सौ 18 हैक्टयर जमीन केई कम्पनियां ने दी गयी है। बैठक मांय राजस्थान प्रेस प्रतिनिधि अधी स्वीकरण नियमां मांय भी फेर बदल कर्यो गयो है।