जयपुर मांय आज 29 वों राष्ट्रीय ई-गवर्नेस सम्मेलन सरू व्ह्यो। इण रा उद्घाटन सत्र मांय मुख्यमंत्री भजन लाल शर्मा कह्यो के प्रधानमंत्री नरेंद्र मोदी री अगुवाई वाळा राज मांय लारला दस साल मांय तकनीक ऊं जुड़्या केई नुवा काम करी ज्या, ज्यां ऊं जनता री जिंदगी आसान बणी है अर राज बत्तो असरदार, उत्तरदायी अर जनता माथे ध्यान देवण वाळो बण्यो है। मुख्यमंत्री राज्य मांय सुशासन सारु तकनीक रा न्यारा-न्यारा प्रयोगां रो जिकर करता थकां कह्यो के आं नुवा कामां ऊं सरकार तांई जनता री पहुंच आसान बणी है। वे कह्यो के ई-गवर्नेंस ऊं प्रशासन अर जनता तांई सरकारी सेवावां री पहुंच मांय घणो बदलाव आयो है। वे कह्यो के डिजिटल इंडिया अभियान अर यूपीआई सरीखी पहलां ऊं जनता ने घणो सुबीतो मिल्यो है अर नान्हा कारोबारियां अर रेहड़ी-पटरी वाळां रो काम आसान व्ह्यो है। श्री शर्मा कह्यो के ए.आई. अर साइबर सुरक्षा, प्रशासन ने बत्तो कारगर बणावण मांय खास काम कर रह्या है। वे कह्यो के राज्य मांय ए.आई. अर मशीन लर्निंग-ए.आई.एम.एल. नीति लागू करी ज्यी है। ईं सागे ई राजस्थान संपर्क पोर्टल जनता री शिकायतां रा निपटारा मांय खास काम आ रह्यो है। कार्यक्रम मांय प्रदेश रा उद्योग, सूचना तकनीक अर युवा अर खेल मंत्री कर्नल राज्यवर्धन राठौड़ ई विचार बताया। प्रशासनिक सुधार अर लोक शिकायत विभाग, इलेक्ट्रॉनिक्स अर सूचना प्रौद्योगिकी मंत्रालय अर राज्य सरकार कानी ऊं मिल र कराया जा रह्या दो दिन रा ईं सम्मेलन रो मुद्दो विकसित भारत 2047-एआई एनेबल्ड, डेटा ड्रिवन एंड सिक्योर डिजिटल गवर्नेन्स राख्यी ज्यो है। सम्मेलन मांय एक हजार ऊं बत्ता स्टार्टअप, स्कूल-काॅलेजां रा 400 ऊं बत्ता नुमाइंदां समेत 2 हजार 700 ऊं बत्ता लोग शामिल व्हे रह्या है। दो दिन रो ओ सम्मेलन प्रशासनिक सुधार अरं लोक शिकायत विभाग, इलेक्ट्रॉनिक्स अरं सूचना प्रौद्योगिकी मंत्रालय अर राजस्थान सरकार मिल र करा रह्या है। ईं मौके मुख्यमंत्री SMART परियोजना , ई मित्र व्हाट्सएप सर्विसेज अर राजस्थान इनोवेशन चैंलेंज पोर्टल री सरुआत कीनी अर एक कॉफी टेबल बुक रो अनावरण ई कीनो।
