मुख्यमंत्री भजनलाल शर्मा कह्यो है के राजस्थान सौर अर अक्षय ऊर्जा पैदा करण रा हलका मांय देश मांय अव्वल है। श्री शर्मा गुरूवार ने जैसलमेर ज़िला रा पोकरण मांय एक गैर सरकारी कंपनी री सूरज री रोशनी ऊं बिजली बणावण री 975 मेगावाट बूता री मशीनां रा उद्घाटन जळसा मांय बोल रह्या हा। मुख्यमंत्री कह्यो के राज्य सरकार 4 हजार 895 मेगावॉट बूता री परम्परागत अर 41 हजार 883 मेगावॉट अक्षय ऊर्जा परियोजनावां रा काम ने अढ़ाई लाख करोड रुप्या रा निवेश ऊं आगे बधायो जावेला। ईं मौके श्री शर्मा कह्यो के राजस्थान नवीकरणीय ऊर्जा पैदा करण रा 500 गीगावॉट बूता रो लक्ष्य हासिल करण मांय खास काम करेला। वे कह्यो के प्रदेश मांय एके पाछे एक सरू व्हे रही सौर अर पवन ऊर्जा री परियोजनावां राज्य ने बिजली बणावण रा मामला मांय खुद रे पाण ऊबो करण मांय खास काम करेला। आज सरू करी ज्यी परियोजना रो जिक्र करता थकां मुख्यमंत्री कह्यो के ईं परियोजना ऊं बिजली कंपनियां ने सस्ती बिजली मिलेला, बिजली रा परंपरागत तरीकां माथे निर्भरता कम व्हेला अर जनता ने नौकरी-धंधा रा मौका मिलेला।कार्यक्रम मांय केंद्रीय नवीन अर नवीकरणीय ऊर्जा मंत्री प्रल्हाद जोशी कह्यो के देश मांय ऊर्जा उत्पादन मांय लगातार बधोतरी व्हे रही है। श्री जोशी कह्यो के ऐड़ी मशीनां ऊं मोटी तादाद मांय घरां तांई नवीकरणीय ऊर्जा पूगायी जा सकेला अर विकसित भारत बणावण रो संकल्प पूरो व्हे सकेला।