मुख्यमंत्री भजनलाल शर्मा कह्यो है के संशोधित ईआरसीपी, राम जल सेतु लिंक परियोजना ने मिशन मोड मांय काम कर र आवता दो साल मांय पूरी करी जावेला। वे बुधवार ने जयपुर मांय वां रा रेहवास माथे जल संसाधन, इंदिरा गांधी नहर विभाग अर जल उपयोगिता विभाग रा अहलकारां सागे राख्यी ज्यी समीक्षा बैठक मांय बोल रह्या हा। श्री शर्मा अहलकारां ने ईं परियोजना रा तैत कराया जा रह्या कामां माथे लगातार निगराणी राखण अर हर पन्द्रह दिन मांय इण री रपट मुख्यमंत्री रा दफ़्तर ने देवण रा हुकम दीना। मुख्यमंत्री कह्यो के ईं परियोजना रे ज़रिए प्रदेश रा 17 ज़िलां मांय पीवण अर पाणत सागे कारखानां ने ई जरूरत रे मुताबिक पाणी मुहैया करावणो तैय करी ज्यो है। मुख्यमंत्री संशोधित पीकेसी ईआरसीपी परियोजना रा न्यारा-न्यारा पैकेजां रा विवरण अर प्रगति री समीक्षा करता थकां भूमि अवाप्ति रा अवार्ड अर क्लीयरेंस रा काम मांय तेज़ी लावण बाबत् कह्यो। ईं बीचे यमुना नदी रा पाणी ऊं जुड़्या करार री विगतवार प्रोजेक्ट रिपोर्ट तैयार करण सारू बणायी ज्यी भेळी टास्क फोर्स री दूजी मीटिंग 20 अप्रैल ने झुन्झुनू ज़िला रा पिलानी मांय व्हेला।