मुख्यमंत्री भजनलाल शर्मा कह्या है के सरकार काश्तकारां ने मजबूत, खुशहाल अर आत्मनिर्भर बणावण सारू संवेदनशीलता रे साथै काम कर री है। मुख्यमंत्री दीतवार ने करौली ज़िला रा कैमरी गांव मांय व्ह्या किसान सम्मेलन मांय बोल रह्या है। ई मौके वणा कह्या के राज्य सरकार अगूणी राजस्थान री मांग ने मंजूर करता रामजल सेतु परियोजना सारू डी.पी.आर. बणावण रो काम सरू कर दियो है। श्री शर्मा कह्यो के साल 2027 तांई प्रदेश मांय काश्तकारां ने दिन री बगत बिजली मुहैया करवाई जायेला। मुख्यमंत्री कैमरी धाम मिंदर मांय विकास रा काम करावण, बालिका छात्रावास खोलण अर पशु चिकित्सालय ने क्रमोन्नत करण रो ई भरोसा दियो। मुख्यमंत्री दीतवार ने संवारा 16वीं जयपुर मैराथन ने रवाना कर्या। ई मौके श्री शर्मा कह्यो के राज्य सरकार नौजवानां री आस ने पूरी करण रो काम कर री है। वणा कह्यो के नौजवान रो ई देश अर प्रदेश री प्रगति मांय अहम भूमिका है अर मैराथन ऊं स्वस्थ रहवण री प्रेरणा मिले है। मुख्यमंत्री कह्यो के राज्य सरकार खेल प्रतिभावां ने हर तरह ऊं बधावो दे री है। प्रदेश आवता बरस मांय खेलो इंडिया गेम्स री मेजबानी करण जा रह्या है जिण ऊं नौजवानां री सहभागिता महताऊ व्हेला।