मुख्यमंत्री भजनलाल शर्मा प्रदेश मांय होवण वाळी न्यारी-न्यारी भर्ती परीक्षावां मांय खास ध्यान अर सावचेती बरतण रा निर्देश दिया है। श्री शर्मा बुधवार ने जयपुर मांय लोकसेवा आयोग अर राजस्थान कर्मचारी चयन बोर्ड कानी ऊं फरवरी म्हीना मांय होवण वाळी परीक्षावां री तैयारियां माथे समीक्षा करी। मुख्यमंत्री कह्यो के प्रश्न पत्रां री गोपनीयता अर हिफाजत माथे सब ऊं बत्ती ध्यान राखणो चाहिजे। वणा अहलकारां ने प्रतियोगी परीक्षावां साफगोई रे साथै करावण अर परीक्षा देवणियां सारू सुविधा रा चौखा इन्तजाम करण री बात कही। मुख्यमंत्री ने पुलिस ने गैर गतिविधियां री खास निगे राखण ने कह्यो। साथै ई वणा परीक्षा केन्द्रा माथे ई हिफाजत रा खास बन्दोवस्त कर्या जावण रा निर्देश दिया। मीटिंग मांय आर.पी.एस.सी. सचिव रामनिवास मेहता बतायो के डमी उम्मीदवारां ने परीक्षा मांय भेळा होवण ऊं रोकण सारू अर्जी अर हाजरी सीट माथे अंगूठा निशाणी लेवण रो नवाचार ई कर्यो जावे। आर.पी.एस़.सी. कानी ऊं प्री-आर.ए.एस.परीक्षा दो फरवरी ने ली जायेला। वठे ई राजस्थान माध्यमिक शिक्षा बोर्ड 27 अर 28 फरवरी ने राजस्थान अध्यापक पात्रता-रीट परीक्षा रो आयोजन करेला।