मुख्यमंत्री भजनलाल शर्मा प्रदेश री महिलावां ने मजबूत बणावण अर वां री हिफ़ाजत तैय करण ने राज्य सरकार री प्राथमिकता बतायी है। वे राज्य री मौजूदा सरकार रो 1 साल पूरो व्हेवण रे मौके थावर ने उदयपुर मांय राख्यी ज्या राज्य स्तर रा महिला सम्मेलन मांय बोल रह्या हा। इण मांय मुख्यमंत्री महिलावां रा भला री न्यारी-न्यारी योजनावां री सरूआत कीनी। ईं मौके वे कह्यो के राज मांय आता ई वे महिलावां रे खिलाफ़ अपराध रोकण सारु काम सरू कर दीनो। मुख्यमंत्री कह्यो के महिलावां सागे छेड़छाड़ री वारदातां रोकण सारु रात री बगत पुलिस री गश्त री व्यवस्था करी ज्यी है अर महिलावां री हिफ़ाज़त सारु ऐप ई सरू करी ज्यो है। मुख्यमंत्री होशियार टाबरियां ने मुफ़्त स्कूटी ई दीनी। वे आंगनबाड़ी केन्द्रां मांय दूध मुहैया करावण री मुख्यमंत्री अमृत आहार योजना, हर विधानसभा हलका मांय 5-5 आंगनबाड़ी केंद्रां, हर ब्लॉक मांय एक आंगनबाड़ी ने आदर्श आंगनबाड़ी बणावण, 45 लाख स्वयं सहायता समूहां सारू राज सखी पोर्टल, 10 हजार इलेक्ट्रिक कुकिंग सिस्टम देवण, आरएसआरटीसी रा सुरक्षा कमाण्ड सेंटर अर बसां मांय पैनिक बटन, महिलावां ने सप्ताह मांय सात ई दिन 24 ई घंटा पुलिस री मदद मुहैया करावण सारू एप अर राज सखी राष्ट्रीय मेला 2024 समेत न्यारी-न्यारी योजनावां अर कार्यक्रमां री सरूआत कीनी। उदयपुर री एक महिला नीतू कंवर कह्यो के लखपति दीदी योजना ऊं वां ने घणो फायदो मिल्यो। ईं सिलसिला मांय ज़िला स्तर माथे ई न्यारा-न्यारा कार्यक्रम राख्यी ज्या। दौसा मांय प्रभारी मंत्री कर्नल राज्यवर्धन सिंह राठौड़ विकास पुस्तिका रो विमोचन कीनो। वे कह्यो के दौसा समेत प्रदेश रा 21 जिलां ने पाणी री पूर्ति करण री पूर्वी राजस्थान नहर परियोजना-ईआरसीपी सारू केंद्र सरकार 1 लाख करोड़ रुप्या मंजूर कीना है। वे कह्यो के प्रदेश मांय खेलां रा 140 कोच भर्ती कर्या जावेला। ईं सिलसिला मांय भीलवाड़ा मांय लखपति दीदी सम्मान समारोह राख्यी ज्यो। स्वयं सहायता समूह री सदस्य मूमल कंवर मुख्यमंत्री सागे वर्चुअल बातचीत रे दौरान बतायो के वा स्वयं सहायता समूह री महिलावां सागे काम कर र आचार बणा रही है जो प्रदेश रा न्यारा-न्यारा ज़िला मांय बेच्यो जा रह्यो है। बालोतरा मांय महिला सम्मेलन रा जिला स्तर रा कार्यक्रम मांय आई.सी.डी.एस., महिला स्वास्थ्य कार्यकर्ता अर राजीविका रा स्वयं सहायता समूहां ऊं जुड़ी महिलावां ई सिरकत कीनी। भरतपुर मांय राख्यी ज्या महिला सम्मेलन मांय राजीविका ऊं जुड़ी लखपति दीदियां ने मान पानो दे र नवाजी ज्यी। डीग मांय जल संसाधन मंत्री सुरेश सिंह रावत जिला स्तर री प्रदर्शनी देखी अर बच्चां ने दूध पिला र मुख्यमंत्री अमृत आहार-आंगनबाड़ी दुग्ध वितरण योजना री सरुआत कीनी। चूरू मांय प्रधानमंत्री मातृ वंदना योजना रो फायदो लेवण वाळी महिलावां ने किस्त री रकम दीरीजी। ईं सागे ई मुख्यमंत्री अमृत आहार योजना अर बढ़ता बचपन 2.0 योजना री सरूआत ई करी ज्यी। कोटा मांय 9 ड्रोन दीदियां अर लखपति दीदियां ने मान पाना दे र नवाज़ी ज्यी। महिला निधि बैंक री ओर ऊं कोटा ज़िला मांय महिलावां ने 5 करोड़ रुप्या री मदद रा चैक दिया ज्या। पाली अर हनुमानगढ़ मांय राख्यी ज्या कार्यक्रमां मांय लखपति दीदी योजना रा तैत महिलावां ने चैक दिया ज्या।