मुख्यमंत्री भजनलाल शर्मा खान अर पेट्रोलियम हलका रा निवेशकां सूं आवती राइजिंग राजस्थान समिट मांय बत्ता ऊं बत्तो निवेश रा प्रस्ताव रे सागे आबा ने कया। वणा महकमा रा राइजिंग राजस्थान प्री-समिट मांय कया के राज्य मांय औद्योगिक निवेश रे मुजब माहौल बणायो जाणो चाहिजे, जिण सूं प्रदेश मांय माळी विकास अर रूजगार रा मौका बढे। इण मौके 63 हजार 463 करोड़ रुपया रा एमओयू माथे दस्तखत कर्या गया। मुख्यमंत्री कया के राज्य मांय माइनिंग सेक्टर री खास भूमिका है अर नई खनिज नीति निवेश खातर तैयार है। दिसम्बर मांय होबा वाळा राइजिंग राजस्थान ग्लोबल इन्वेस्टमेंट समिट मांय देश-विदेश रा निवेशक भाग लेवेला। समिट मांय राज्य री खनिज संपदा, औद्योगिक विकास अर रूजगार रा मौका माथे चर्चा व्हेला। मुख्यमंत्री कया के राज्य मांय एक लाख 41 हजार 184 करोड़ रुपया सूं बत्ता रा निवेश प्रस्तावां माथे दस्तखत व्हे चुक्या है। इण बीच शुक्रवार ने राजधानी मांय जयपुर जिला रे अलावा जयपुर ग्रामीण अर दूदू री इन्वेस्टर मीट राख्यी गई। अजमेर अर केकड़ी मांय राख्यी जिला स्तरीय इन्वेस्टर मीट मांय उपमुख्यमंत्री दिया कुमारी मौजूद री। अजमेर मांय मीट रे दौरान 14 हजार करोड़ सूं बत्ता रा एमओयू व्ह्या।
इण मांय मार्बल, ग्रेनाईट, टैक्सटाइल, चिकित्सा, शिक्षा, होटल अर रिसोर्ट, खनन, सोलर, एग्रो, फूड, इंफ्रास्ट्रक्चर समेत दूजा हलकां मांय नुवा कारोबार री थापना रा प्रस्ताव भेळा है। आं कानी ऊं करीब 15 हजार सूं बत्ता लोगां ने रूजगार मिलेला। केकड़ी मांय 3 हजार करोड़ रुपया सूं बत्ता रा 239 एमओयू साइन कर्या गया। इण मौके उपमुख्यमंत्री दिया कुमारी कया के राइजिंग राजस्थान इन्वेस्टर मीट राज्य मांय औद्योगिक विकास अर रूजगार बढाबा री दिशा मांय महताऊ कदम है। वे बतायो के राज्य मांय निवेशकां खातर चावतो व्यापारिक माहौल बणायो जा रियो है। भीलवाडा मांय व्ही इन्वेस्टर मीट मांय जिला री प्रभारी अर महिला बाल विकास मंत्री मंजू बाघमार शिरकत करी। वणा मीट रा बारा मांय जाणकारी दी।