मुख्यमंत्री अनुप्रति कोचिंग योजना रा तैत कोचिंग लेवण वाळा विद्यार्थियां री तादाद आवता बगत मांय 50 हजार करी जावेला। सामाजिक न्याय अर अधिकारिता मंत्री अविनाश गहलोत विधानसभा मांय आ जाणकारी दीनी। वे बतायो के ईं योजना रा तैत मौजूदा दौर मांय तीस हजार विद्यार्थियां ने कोचिंग रो सुबीतो मुहैया करायो जा रह्यो है। गहलोत बतायो के साल 2023-24 मांय विद्यार्थियां ने कोचिंग रो सुबीतो मुहैया करावण रा काम माथे करीब 102 करोड़ रुप्या खर्च करी ज्या। वे बतायो के साल 2025-26 सारू ईं योजना बाबत् 209 करोड़ रूप्या राख्यी ज्या है। प्रदेश री महात्मा गाँधी अंग्रेजी स्कूलां चलावण रा बारा मांय राज्य सरकार मंत्रिमंडलीय उपसमिति बणायी है। शिक्षा मंत्री मदन दिलावर सोमवार ने विधानसभा मांय आ जाणकारी दीनी। वे बतायो के विद्यार्थियां रा भला ने ध्यान राखता थकां समिति री रपट रा आधार ऊं आगे री कार्यवाही करी जावेला। सदन मांय सहकारिता राज्यमंत्री गौतम कुमार दक बतायो के प्रधानमंत्री किसान सम्मान निधि रो फायदो लेवण वाळा अपात्र लोगां ऊं वसूली करी जावेला। वे बतायो के पाली जिला मांय अतिरिक्त ज़िला कलेक्टर (सीलिंग) किसान सम्मान निधि रा तैत गैर-कानूनी तरीका ऊं रकम भेजण रा मामला री जांच कर रह्या है। युवा मामलात् अर खेल मंत्री कर्नल राज्यवर्धन राठौड़ सदन ने बतायो के राज्य री 5 हजार ऊं बत्ती आबादी वाळी साढे तीन हजार ग्राम पंचायतां मांय खुल्या जिम बणाया जावेला। वे बतायो के ’’मेजर ध्यानचन्द स्टेडियम योजना’’ रा तैत राज्य रा हर ब्लॉक मांय खेल स्टेडियम बणावण ऊं जुड़्या कामां सारू विधायक-सांसद निधि, जनता री मदद अर कंपनियां कानी ऊं कोर्पोरेट सामाजिक दायित्व रा तैत दीरीजी रकम रे बराबर या बत्ता-ऊं-बत्ता एक करोड़ रूप्या मेचिंग ग्रांट रा तौर ऊं देवण रो प्रावधान है।