केन्द्रीय महिला अर बाल विकास मंत्री अन्नपूर्णा देवी कह्यो है के सरकार महिलावां अर बच्चां रा पूरा विकास माथे खास ध्यान दे रही है। वे थावर ने उदयपुर मांय महिलावां अर बच्चां रा भला रा बारा मांय राष्ट्रीय चिंतन शिविर रा औपचारिक उद्घाटन जळसा मांय बोल रही ही। वे महिला अर बाल विकास मंत्रालय री न्यारी-न्यारी पहलां री जाणकारी दीनी। केन्द्रीय मंत्री कह्यो के आंगनबाड़ियां रा नेटवर्क ने मज़बूत कर्यो जा रह्यो है। वे कह्यो के बाल संरक्षण योजनावां रो बजट करीब डोढ़ हजार करोड़ रूप्या व्हे ग्यो है, जो साल 2009 मांय 60 करोड़ रूप्या हो। कार्यक्रम मांय मुख्यमंत्री भजनलाल शर्मा प्रदेश मांय महिलावां अर बच्चां रा विकास सारू चलाई जा रही योजनावां सागे ई नीतिगत फैसलां अर आगली कार्ययोजनावां रा बारा मांय जाणकारी दीनी। वे कह्यो के राज्य सरकार ई महिलावां अर बच्चां री बेहतरी सारू भांत-भांत रा जतन कर रही है।
प्रदेश री उपमुख्यमंत्री अर महिला अर बाल विकास मंत्री दिया कुमारी कार्यक्रम मांय कह्यो के आं सत्रां रे मार्फत महिलावां अर बच्चां ने मज़बूत बणावण ऊं जुड़ी न्यारी-न्यारी योजनावां रो मज़मून तैयार कर्यो जावेला। चिंतन शिविर मांय मिशन वात्सल्य, मिशन शक्ति अर मिशन सक्षम आंगनबाड़ी सागे ही पोषण 2.0 रा बारा मांय चर्चा करी जा रही है। चिंतन शिविर दीतवार ने पूरो व्हेला।