हिम्मत अर खुद रा मान री अमर निशाणी महाराणा प्रताप री जयंती अर हल्दीघाटी री लडाई मांय अकबर रे खिलाफ जीत रा साढ़े चार सौ साल पूरा व्हेवण रे मौके बुधवार ने प्रदेश मांय केई कार्यक्रम राख्यी ज्या। ईं मौके राज्यपाल हरिभाऊ बागड़े भारतीय क्षत्रिय महासंघ री ओर ऊँ जयपुर मांय राख्यी ज्या मान जळसा मांय महाराणा प्रताप ने याद करता थकां वां रा आदर्शां माथे चालण बाबत् कह्यो। श्री बागड़े कह्यो के महाराणा प्रताप री ज़िन्दगी अन्याय अर अनैतिकता ऊँ लड़बा री सीख देवे है। महाराणा प्रताप री जयंती रे मौके उदयपुर मांय शोभायात्रा निकाळी ज्यी अर राष्ट्र चेतना संकल्प सभा राख्यी ज्यी। कार्यक्रम मांय मुख्यमंत्री भजनलाल शर्मा, न्यारी-न्यारी धार्मिक पीठां रा साधु-संत अर मोटी तादाद मांय लोग शामिल व्ह्या। ईं मौके राष्ट्रीय स्वयंसेवक संघ रा सरसंघचालक मोहन भागवत महाराणा प्रताप री लडाई ने देश री स्वतंत्र चेतना, खुद रा मान अर सांस्कृतिक अस्मिता री हिफाजत री निशाणी बतायी। वीर योद्धा महाराणा प्रताप री जयंती रे मौके पाली समेत न्यारा-न्यारा ज़िला मांय फूल चढावण अर गौरवगान कार्यक्रम राख्यी ज्या। ईं मौके सलूंबर ज़िला रा चावंड मांय महाराणा प्रताप स्मारक स्थल माथे महाराणा प्रताप री मूरत माथे फूल माळा चढायी ज्यी अर खास कार्यक्रम राख्यी ज्यो। कार्यक्रम मांय मौजूद लोग महाराणा प्रताप रा त्याग, बहादुरी अर खुद माथे नाज करण ने याद करता थकां वां रा आदर्शां री पालना रो संकल्प लीनो। पाली मांय राख्यी ज्या कार्यक्रम मांय पशुपालन अर देवस्थान मंत्री जोराराम कुमावत महाराणा प्रताप री मूरत माथे सिरधा रा फूल चढ़ाया। वठे न्यारी-न्यारी सामाजिक संस्थावां री ओर ऊँ जुलूस अर रैली निकाळी ज्यी। अजमेर जिला रा किशनगढ़ मांय स्कूटर-मोटरसाइकिल चलावण वाळां ने हेलमेट दे र यातायात सुरक्षा रो संदेश दियो ज्यो।