प्रधानमंत्री नरेन्द्र मोदी कह्यो है के आर्टिफिशियल इंटेलिजेंस-ए आई रा हलका मांय भारत तेजी ऊं आप री मजबूत पिछाण बणा रह्यो है। आकाशवाणी रा मन की बात कार्यक्रम मांय दीतवार ने श्री मोदी कह्यो के भारत रा लोग नुवी प्रौद्योगिकी अपणावण मांय किणी ऊं पाछे नी है। प्रधानमंत्री इण बात माथे ध्यान दिरायो के नौजवानां री भागीदारी ऊं अंतरिक्ष अर आर्टिफिशियल इंटेलिजेंस जस्या न्यारा-न्यारा हलकां मांय नुवी क्रांति आय री है। वणा इण बात माथे मान जतायो के देश लारला मीना इसरो री मार्फत आप रो एक सौ वो रॉकेट छोड्यो। श्री मोदी कह्यो के इसरो री कामयाबी रो दायरो घणो है। प्रधानमंत्री ई म्हीना री 28 तारीख ने राष्ट्रीय विज्ञान दिवस मनावण ने देखता सुणण वाळां ने आप रो एक दिन वैज्ञानिक रा रूप मांय बितावण रो सुझाव दियो। वणा कह्यो के सुणण वाळां किणी अनुसंधान प्रयोगशाला, तारामंडल अर अंतरिक्ष केन्द्र जस्सी ठौड़ा माथे जा सके है। श्री मोदी महिलावां रा बारा मांय आप रा विचार साझा करता कह्यो के देश री मातृशक्ति स्वतंत्रता संग्राम अर संविधान निर्माण समेत सगळा हलका मांय महताऊ भूमिका निभाई है।
प्रधानमंत्री ऐलाण कर्यो के 8 मार्च ने अंतर्राष्ट्रीय महिला दिवस माथे वे एक्स अर इंस्टाग्राम जस्या आप रा सोशल मीडिया अकाउंट, एक दिन सारू कुछ प्रेरक महिलावां ने सूंपेला जिण न्यारा-न्यारा हलका मांय कामयाबी हासिल करी है, अर आप री न्यारी पिछाण बणायी है। वणा कह्यो के महिला दिवस माथे महिलावां प्रधानमंत्री रा एक्स अर इंस्टांग्राम अकाउंट ऊं पूरी दुनिया तांई आप री बात पूगावण रा मौका रो फायदो उठा सके है। प्रधानमंत्री उत्तराखंड मांय राष्ट्रीय खेलां रा रोमांच री ईं चर्चा करी जठे, 11 हजार ऊं बत्ती खिलाड़ियां शानदार प्रदर्शन कर्यो। श्री मोदी सब ऊं बत्ती सोना रा तमगा जीतण वाळी सेना री टीम ने बधाई दी। वणा कह्यो के आपा रा घणखरां खिलाड़ी खेलो इंडिया अभियान की देन है। मन की बात कार्यक्रम श्री मोदी देश री वनस्पति अर जीव-जंतुआं ने बचावण ऊं जुड्या कामां मांय सक्रिय भाग लेवण सारू देश रा जनजातीय लोगां रे प्रति आभार जतायो। प्रधानमंत्री मोदी कह्यो के जंगळी जीव संरक्षण ऊं जुड़्या लोगां री कोशिश रे कारण लारला कुछ साला मांय बाघा, तेंदुआं, एशियाई शेर अर बारहसिंघां री आबादी तेज़ी ऊं बधी है। आवता म्हीना रे सरू मांय विश्व वन्य जीव दिवस रो आयोजन व्हेणो है। प्रधानमंत्री सगळां ऊं वन्य जीव संरक्षण ऊं जुड़्या लोगां ने बधावो देवण री अरज करी। ई कार्यक्रम रे आखिर मांय प्रधानमंत्री नरेन्द्र मोदी बोर्ड री परीक्षा मांय हिस्सो ले रह्या परीक्षा योद्धवां ने शुभकामनावां दी। वणा पढेसरा ऊं कह्यो के बिना तनाव रे सकारात्मक भावना रे साथे आप रा इम्तिहान देवे।