प्रधानमंत्री नरेन्द्र मोदी डिजिटल अरेस्ट रा बारा मांय चिंता जतायी। प्रधानमंत्री दीतवार ने आकाशवाणी सूं मन की बात कार्यक्रम मांय कह्या के कानूनन किणी रो भी डिजिटली अरेस्ट न कियो जा सके है। वे कह्या के डिजिटल अरेस्ट रा नाम माथे करी जा री धोखाधड़ी ने रोकबा खातर सगळी जांच एजेंसियां मिल र काम कर री है। प्रधानमंत्री कार्यक्रम रे दौरान एक पीड़ित अर एक जालसाज रे बीच व्ही बातचीत ने भी सुणाया। बातचीत मांय जालसाज खुद ने पुलिस, सी.बी.आई. अर नार्कोटिक्स मेहकमां रो अधिकारी बता रह्यो हो। इण भांत रा जालसाज, पीड़ित सू व्यक्तिगत सूचनावां ले र ड़र रो माहौल बणा देवे है। प्रधानमंत्री कह्या के हर वर्ग अर उम्र रा व्यक्ति डिजिटल अरेस्ट रा शिकार व्ह्या है। इण रे चालता वांने लाखो रूप्यां रो घाटो पूग्यो है। वणा लोगां सूं अरज करी के इण भांत रा फर्जी कॉल आबा माथे डरणो नी चाहिजे। प्रधानमंत्री डिजिटल सुरक्षा खातर तीन उपायां माथे चर्चा करी। कल विश्व एनिमेशन दिवस है। इण मौके प्रधानमंत्री कह्या के भारत एनिमेशन री दुनिया मांय नई क्रांति री ओर बढ़ रह्यो है। वणा लोगां सूं अरज करी के वे भारत ने एनिमेशन री दुनिया री वैश्विक शक्ति बणावा रो संकल्प लेवे। प्रधानमंत्री कह्या के भारत गेमिंग री दुनिया मांय लगातार आगे बढ रह्यो है। भारतीय खेल दुनिया भर मांय पसंद कर्या जा रह्या है। प्रधानमंत्री कह्या कि अबे एनिमेशन इण भांत रो उद्योग बण ग्यो है जो दूजा उद्योगां ने भी ताकद दे रह्यो है। वी आर टूरिज्म इण रो एक उदाहरण है।
प्रधानमंत्री आत्मनिर्भर भारत अभियान री सफलता माथे खुशी जतायी। वे कह्या के यो अभियान देश री सामूहिक चेतना रो अंग बण गयो है। वे कह्यो के कदे दुनिया मांय सब ऊं बत्तो सुरक्षा औजार खरीदबा वाळो भारत, आज, 85 देशां ने एक्सपोर्ट भी कर रह्यो है। स्पेस टेक्नालॉजी मांय भारत आज चंद्रमा रा साउथ पोल माथे पूगवा वाळो पैलो देश बण ग्यो है। प्रधानमंत्री श्रोतावां सूं नवाचार अर आत्मनिर्भर भारत संबंधी उदाहरण सोशल मीडिया माथे साझा करबा री अरज करी। वणा त्यौहारां रा इण मौसम मांय खऱीदारी करता टेम वोकल फॉर लोकल रा मंत्र ने ध्यान मांय राखबा री अरज करी। प्रधानमंत्री कह्या के इण बरस दो महान नायक-सरदार पटेल अर भगवान बिरसा मुंडा री 150वीं जयंती है। सरदार पटेल री 150वीं जंयती इण म्हीना री 31 तारीख ने है। जद के भगवान बिरसा मुंडा री 150वीं जयंती 15 नवम्बर ने मनायी जावेला। मन की बात मांय प्रधानमंत्री फिट इंडिया रा बारा मांय भी बात करी। वणा संतोष जतायो के भारत रा लोग फिटनेस रा बारा मांय बत्ता जागरूक व्हे रह्या है। प्रधानमंत्री सरदार पटेल री जयंती, राष्ट्रीय एकता दिवस माथे हर बरस राख्यी जाबा वाळी रन फोर युनिटी ने दीवाळी रा त्यौहार रे चालता दो दिन पैली 29 अक्टूबर ने राखबा री जाणकारी देता थकां लोगां सूं इण मांय बत्ती संख्या मांय भाग लेबा ने कह्या। कार्यक्रम मांय प्रधानमंत्री देशवासियां ने आवता त्यौहारां री शुभकामनावां देता थकां पूरा उच्छाव रे साथै आं ने मनावा री अरज करी। प्रधानमंत्री रा मन की बात कार्यक्रम ने सुणबा खातर प्रदेश मांय भी खासों उच्छाव नजर आयो। मुख्यमंत्री भजन लाल शर्मा अर भाजपा प्रदेश अध्यक्ष मदन राठौड़ जयपुर मांय मुख्यमंत्री निवास माथे मन की बात कार्यक्रम ने सुण्या। प्रदेश भाजपा री कानी ऊं ज़िला मुख्यालय अर पार्टी कार्यालयां मांय कार्यक्रम राख्या ग्या। इण मांय बडी संख्या मांय सरकार रा मंत्री अर जनप्रतिनिधि अर कार्यकर्तावां भाग लिना।