प्रधानमंत्री नरेंद्र मोदी कह्यो है के है कि अंतरिक्ष रा हलका मांय सुधारां ऊं देश रा नौजवानां ने फायदो व्ह्यो है। वणा कह्यो के ई मीना री 23 तारीख ने देशवासियां पहलो राष्ट्रीय अंतरिक्ष दिवस चंद्रयान-3 री कामयाबी ने जश्न रा रूप मांय मनाया। आज आकाशवाणी ऊं मन की बात कार्यक्रम मांय प्रधानमंत्री कह्यो के लारला साल 23 अगस्त ने चंद्रयान-3 ने चंद्रमा रा दिखणाद भाग शिव-शक्ति बिंदु माथे कामयाबी पूरण उतार्या हा। प्रधानमंत्री कह्यो के भारत आ कामयाबी हासिल करण वाळो दुनिया रो पैलो देश बण ग्यो।प्रधानमंत्री कार्यक्रम रे दौरान स्पेस सेक्टर मांय स्टार्टअप सरू करण वाळां नौजवानां ऊं बतळ ई करी। श्री मोदी मन की बात कार्यक्रम री मार्फत नौजवानां ऊं विकसित भारत रा लगस ने हासिल करण सारू देश रा पॉलिटिकल सिस्टम ऊं जुड़ण री अरज करी। वणा कह्यो के ई साल लाल किलां ऊं वणा गैर राजनैतिक पृष्ठभूमि वाळा एक लाख नौजवानां ने राजनैतिक हलका ऊं जुड़ण री अरज करी ही। इण रे पछे घणकरां नौजवानां प्रतिक्रिय दी अर वे राजनीति मांय आवण सारू उमाऊ है। अर सही मौका अर मार्गदर्शन री तलाश कर रह्या है। प्रधानमंत्री कह्यो के लोगां रा जीवन मांय फिटनेस घणी जरूरी है। वणा फिट रहवण सारू लोगां ऊं आप रा खान-पान अर जीवन शैली माथे ध्यान देवण ने कह्यो। श्री मोदी लोगां ऊं सुपर फूड मोटा अनाज ने आप रे रोज रा भोजन मांय भेळा करण ने कह्यो। प्रधानमंत्री कह्यो के टाबरां री चोखी सेहत सारू जरूरी है के वां ने सही पोषण मिलतो रह्वे। टाबरां रो पोषण देश री प्राथमिकता है। श्री मोदी कह्यो के हर साल देश मांय पोषण मीनो मनायो जावे है। लारली साल पोषण अभियान ने नुवी शिक्षा नीति ऊं ई जोड़िज्या है। वणा ई अभियान ऊं जुड़ण री अरज करी। प्रधानमंत्री हर घर तिरंगा अभियान मांय देशवासियां कानी ऊं दिखायी ज्या उमाव साथे कह्यो के ओ अभियान आखा देश ने एक सूत्र मांय बांध दिया। श्री मोदी कार्यक्रम री मार्फत लोगां ऊं पर्यावरण संरक्षण री ई बात कही। प्रधानमंत्री देश वासियां ने आवता तिवारां -जन्माष्टमी, गणेश चतुर्थी, ओणम, मिलाद-उन-नबी अर तेलुगु भाषा दिवस री शुभकामनावां दी। वणा आवण वाळां दिना सरू व्हे रह्या पेरिस पैरालंपिक खेलां मांय हिस्सो ले रह्या खिलाड़ियां रो हौसलो बधावण सारू हेश टेग चियर फॉर भारत रे साथे खिलाड़ियां ने बधावो देवण ने कह्यो। प्रदेश मांई ई मन की बात कार्यक्रम ने ले र उमाव निजर आयो। घणखरी ठौड़ां लोगां मन की बात कार्यक्रम ने सुण्या। मुख्यमंत्री भजन लाल शर्मा आज जोधपुर रा एस.एन. मेडिकल कॉलेज सभागार मांय मन की बात कार्यक्रम री 113 वी कड़ी ने सुण्या। ई दौरान भाजपा प्रदेश अध्यक्ष मदन राठौड, संसदीय कार्यमंत्री जोगाराम पटेल समेत घणी तादाद मांय जननुमाइन्दा अर भाजपा कार्यकर्ता मौजूद रह्या। जैसलमेर सांचौर अर भीलवाड़ा मांय भाजपा कार्यकर्तावां अर जनप्रतिनिधियां मन की बात कार्यक्रम ने सुण्या। टोंक जिला मांय ई केई ठौड़ां माथे लोगां मन की बात कार्यक्रम सुण्या।