मकर संक्रांति रो पर्व मंगलवार ने मनायो जावेला। ईं मौके जातरू सरोवर मांय पवित्र स्नान कर र दान-पुण्य करे है। ईं सागे ई मलमास पूरो व्हेवण ऊं मंगलवार ऊं मांगलिक काम ई ओजू सरू व्हे जावेला। संकरात ऊं पैली सोमवार ने बाजारां मांय रौनक निजर आ रही है। तिल, फीणी अर गजक री दुकानां माथे मोटी तादाद मांय लोग खरीदी कर रह्या है। रंग बिरंगी पतंगां अर चरखियां ऊं ई बाजार सज्योड़ा है अर बच्चां मांय कार्टून वाळी पतंगां री मांग सब ऊं बत्ती है। ईं मौके मंगलवार ने पर्यटन विभाग री ओर ऊं जयपुर मांय जलमहल री पाल परां पतंग उत्सव राख्यो जावेला, जिण मांय देशी-परदेशी सैलानियां अर जनता सारू भांत-भांत रा कार्यक्रम अर सांस्कृतिक प्रस्तुतियां राख्यी जावेला।