मंगलवार ने देवउठनी ग्यारस रे मौके मांगलिक काम ओजू सरु व्हे ग्या। ईं मौके केई ठौड़ां तुलसी शालिगराम रो पूजन ई करी ज्यो। अबूझ मुहुर्त व्हेवण रे कारण मंगलवार ने मोटी तादाद मांय जोड़ां रा ब्याह व्ह्या। पाली, भीलवाड़ा, केकड़ी, शाहपुरा, जैसलमेर अर सवाईमाधोपुर समेत केई ठोड़ां मिन्दरां मांय न्यारा-न्यारा आयोजन व्ह्या। करौली रा अंजनी माता मिन्दर मांय ई मोटी तादाद मांय जातरू पूग्या। ईं मौके करौली मांय ज़िला कलेक्टर छुट्टी रो ऐलाण कीनो है। ब्रज हलका रा भरतपुर मांय ई देव उठनी ग्यारस रे मौके जातरू पवित्र स्नान कर र सुख-समृद्धि री कामना कीनी। बांसवाड़ा रा त्रिपुर सुंदरी मिन्दर मांय मंगलवार ने प्राकट्योत्सव मनायी ज्यो, जदके सीकर जिला रा खाटूश्याम जी मिन्दर मांय ई मोटी तादाद मांय जातरू पूग्या। सवाईमाधोपुर, पाली अर कोटा मांय ई खाटूश्याम रो जन्मोत्सव मनायी ज्यो। पाली रा राधाकृष्ण मिन्दर अर कोटा रा मथुराधीश मिन्दर मांय खास धार्मिक आयोजन राख्यी ज्या। भरतपुर रा बांकेबिहारी मिन्दर मांय झांकी सजाई ज्यी। घरां मांय महिलावां मंगल गीत गाया। ईं सागे ई कने रा गोवर्धन धाम मांय जातरु गिरिराज जी री सात कोस री परिक्रमा कीनी। डीग ज़िला रा कामां मांय तीर्थराज विमल कुंड माथे सवा लाख दीयां ऊं सजावट करी ज्यी। झालावाड़ रा चंद्रमौलेश्वर मिन्दर मांय भजन-कीर्तन रा अर दूजा आयोजन राख्यी ज्या। जैसलमेर रा रुणिचा कुआं माथे हवन, यज्ञ अर दूजा धार्मिक अनुष्ठान राख्यी ज्या। दूजी कानी नामी पुष्कर मेळा मांय मंगलवार ने देवस्थान अर पर्यटन विभाग री ओर ऊं आध्यात्मिक यात्रा निकाळी ज्यी, जिण रो खादिमां री संस्था अंजुमन री ओर ऊं स्वागत करी ज्यो। पुष्कर मांय पंच तीर्थ स्नान सरू व्ह्यो। जातरूआं रा सुबीता सारू अजमेर-पुष्कर बीचे तीन खास रेलगाड़ियां चलाई जा रही है।