मंगलवार ने अन्तर्राष्ट्रीय वृद्धजन दिवस मनायी ज्यो। ईं मौके नई दिल्ली मांय राख्यी ज्या जळसा मांय सामाजिक न्याय अर अधिकारिता मंत्री डॉ. वीरेन्द्र कुमार कह्यो के मंगलवार ने जूनी पीढ़ी री बुद्धिमानी, धीरज अर योगदान रो मान करण अर वां सागे बिताया बगत ने याद करण रो दिन है। वे कह्यो के बुजुर्ग मौजूदा पीढ़ी ने सही गेलो बतावण मांय खास काम करे है। केन्द्रीय मंत्री कह्यो के सरकार बुजुर्गा रा भला सारू लगातार काम कर रही है अर आवता साल अंतर्राष्ट्रीय वृद्धजन दिवस रे मौके स्कूलां मांय मोटा पैमाना माथे कार्यक्रम राखण री योजना बना रही है। अंतर्राष्ट्रीय वृद्धजन दिवस रे मौके सामाजिक न्याय अर अधिकारिता विभाग री ओर ऊं राज्य स्तर रो जळसो जयपुर मांय राख्यी ज्यो। जळसा मांय सिरोही जिला रा भीक सिंह भाटी ने सामाजिक हलका मांय बेहतरीन काम करण सारू नवाजी ज्या। ईं सागे ई बुजुर्गां रा भला, सांस्कृतिक, कला, सामाजिक अर साहित्य रा हलका मांय खास काम करण वाळा बुजुर्गां अर बुजुर्गां रा भला सारू काम करण वाळी खुद सेवक संस्थावां रा नुमाइंदां रो मान करी ज्यो। प्रदेश रा दूजा जिला ऊं ई ईं मौके कार्यक्रम राख्या जावण रा समाचार मिल्या है। बारां मांय न्यारा-न्यारा मुख्यमंत्री पुनर्वास घरां मांय बुजुर्गां रा मान सारू कार्यक्रम राख्यी ज्या। डीग जिला रा नगर मांय बुजुर्गां रो माळा पहरा र अर शॉल ओढा र मान करी ज्यो। जैसलमेर मांय भारत निर्वाचन आयोग अर राज्य निर्वाचन विभाग री ओर ऊं एक सौ साल रा बत्ती उम्र रा मतदातावां रो मान करी ज्यो। गांधी कॉलोनी री रहवासी शतायु मतदाता नबियादेवी रो वां रे घर जा र माळा पहरा र अर मुख्य निर्वाचन अधिकारी कानी ऊं भेजी ज्यो मानपानो दे र मान करी ज्यो। पाली जिला रा सोजत मांय सोजत विधानसभा हलका रा सौ साल ऊं बत्ती उम्र रा 104 मतदातावां रो मान करी ज्यो। झालावाड़ मांय राख्यी ज्या कार्यक्रम मांय वृन्दावन रा 101 साल रा मांगीलाल अर झालावाड़ रा 100 साल रा किशनलाल ने खास पावणा रा तौर ऊं मुख्य निर्वाचन आयुक्त कानी ऊं भेजी ज्यो मानपानो दे र नवाजी ज्या। ज़िला रा झालरापाटन मांय पंडित गिरधर शर्मा नवरत्न वाचनालय मांय बुजुर्ग कपड़ा कारोबारियां रो मान करी ज्यो। बाड़मेर ज़िला मांय 104 साल री लच्छी, 103 साल री कुसुम कंवर अर मूसो अर 102 साल री लाधू देवी समेत 100 साल या बत्ती उम्र रा केई मतदातावां रो मान पानो दे र मान करी ज्यो। नागौर मांय चेनार गांव रा 103 साल रा मतदाता नूरा ने सर्टिफिकेट दे र नवाजी ज्या। सलूम्बर मांय राख्यी ज्या कार्यक्रम मांय शतायु मतदातावां रो मान करी ज्यो। डूंगरपुर मांय सीमलवाड़ा पंचायत समिति मांय राख्यी ज्या मान जळसा मांय 100 साल या बत्ती उम्र रा देवंग मनात अर मोहम्मद बंगा रो मान करी ज्यो।