जोधपुर मांय चाल रह्या भारत समेत 8 देशां री फौज़ रा युद्धाभ्यास तरंग शक्ति मांय आज सेना रा तीनु अंगां रा वाइस चीफ स्वदेशी लड़ाकू विमान तेजस मांय उड़ान भरी। ई दौरान अमरीका, जापान, फ्रांस, ग्रीस, ऑस्ट्रेलिया, श्रीलंका अर सिंगापुर रा एयर फोर्स ऑफिसर अर 16 ऊं बत्ती देशां रा पर्यवेक्षक गवाह बण्या। तीनु उप प्रमुखां री आं उड़ान महताउ रणनीतिक तौर माथे देखी जावे। फौज रा वाइस चीफ लेफ्टिनेंट जनरल एन.एस. राजा सुब्रमणी, एयरफोर्स रा वाइस चीफ एयर मार्शल ए.पी. सिंह अर नौसेना रा वाइस चीफ कृष्णा स्वामीनाथन दुनिया रा देशां ने भारत रा युद्धक विमान रा हुनर रा बूतां री जाणकारी दी। अभ्यास मांय भेळा सगळा देशां रा एयर चीफ 12 सितम्बर ने जोधपुर आवेला। वे एक-दूजा रा लड़ाकू विमानां ने उड़ा र वां रा बूंता ने परखेला। तरंग-शक्ति 2024 रो ओ दूजो चरण है। इण ऊं पैला 6 ऊं 14 अगस्त तांई तमिलनाडु रा सुलार मांय इण रो पैलो चरण पूरो व्ह्यो हो। इण मांय 30 देशां रा वायुसेना रा जवान भेळा व्ह्या हा।