भाईदूज रा तिवांर दीतवार ने परम्परागत उछाव रे सागे मनायो जा रहे्यो है। कार्तिक मास रा शुक्ल पक्ष री दूज ने यो तिवांर मनायो जावे है। ईण दिन बहनां भाई रे टिको कर उण री लम्बी उम्र अर खुशहाली री कामना करे है। केई ठौड़ां माथे इण मौके बहनां आप रा भाई रे रक्षा सूत्र बांधे हैं। दीवाळी रे दो दिन पाछे मनाया जाबा वाळां इण तिवांर रे सागे ई दीपोत्सव पूरो व्हे जावे है। प्रधानमंत्री नरेन्द्र मोदी भाई दूज रे मौके देशवासियां ने शुभकामनावां दी है। सोशल मीडिया पोस्ट मांय वणा आस जतायी के ओ तिवांर भाई अर बहनां रे बीच विश्वास ने पक्को करे है। मुख्यमंत्री भजनलाल शर्मा भी भाई-बहन रा प्रेम अर विश्वास रो प्रतीक ईण तिवांर माथे प्रदेश वासियां ने शुभकामनावां दी। प्रदेश मांय भी भाईदूज उच्छाव रे सागे मनायी जा री है। बांसवाड़ा, झालावाड़, पाली, टोंक, दौसा अर जयपुर समेत दूजी ठौड़ां माथे भाई दूज रे मौके घणो उच्छाव देख्यो ग्यो है। वठिने, भीलवाडा जिला रा मांडल कस्बा मांय शनिवार ने गोवर्धन पूजा माथे गाय बैलां री विधि विधान सागे पूजा करी गयी। ईण मौके गर्धभ पूजन भी व्ह्यो। वठिने जैसलमेर जिला मांय भी भाई दूज रो तिवांर धूम-धाम सूं मनायो जा रह्यो है। सोनार दुर्ग रा आराध्य देव लक्ष्मीनाथजी रा मिंदर मांय दीतवार ने बडी संख्या मांय सिरधालू भगवान रा दर्शन कर्या।