ब्रिक्स देशां री भारत री सदारत मांय व्हेवण वाळी मीटिंग ऊँ पैली आं देशां रा वाणिज्य मंत्रियां री 16वीं मीटिंग शुक्रवार ने जयपुर मांय पूरी व्ही। केंद्रीय वाणिज्य अर उद्योग मंत्री पीयूष गोयल री सदारत मांय व्ही मीटिंग मांय ब्रिक्स सदस्य देशां रा व्यापार मंत्रियां अर प्रतिनिधिमंडल दुनिया री बदलती कारोबारी व्यवस्था, बहुपक्षीय व्यापार प्रणाली ने मज़बूत बणावण, वैश्विक मूल्य श्रृंखला ने बत्ती लचीली बणावण, एमएसएमई इकाइयां ने दुनिया रो बाज़ार मुहैया करावण, व्यापार वित्त तांई वां री पहुंच अर डिज़िटल सेवावां ने बधावो देवण सरीखा खास मुद्दा माथे चर्चा कीनी। मीटिंग मांय विश्व व्यापार संगठन ने केंद्र मांय राखता थकां विकास वाळी, नियम-आधारित अर सगळां री एक राय माथे आधारित बहुपक्षीय व्यापार प्रणाली री प्रतिबद्धता दोहराई ज्यी। मीटिंग री खास उपलब्धि किसानां अर एम.एस.एम.ई. कारोबारियां रा भला ने बधावो देवण वाळा फैसला रही। मीटिंग मांय एमएसएमई सारू व्यापार वित्त ने आसान बणावण, वैश्विक मूल्य श्रृंखला मांय मदद बधावण, कारोबार ऊँ जुड़्या कागज़ात ने डिज़िटल बणावण अर सरहद पार डिज़िटल सेवावां ने बधावो देवण ऊँ जुड़ी कार्य योजनावां ने मंजूरी दीरीजी। ईं सागे ई ब्रिक्स आर्थिक साझेदारी रणनीति-2030 ने ई अंतिम रूप दियो ज्यो, जिण ने आवता महीना नई दिल्ली मांय व्हेवण वाळा ब्रिक्स शिखर सम्मेलन मांय नेतावां री मंजूरी सारू पेश करी जावेला।