बुधवार ने गुरू पूर्णिमा रे मौके आखा राज्य मांय जातरू सिरधा भाव सागे गुरूजनां, संतां अर महंतां रो आशीर्वाद लीनो। जयपुर मांय राख्यी ज्या गुरू पूर्णिमा महोत्सव मांय केन्द्रीय संस्कृति अर पर्यटन मंत्री गजेन्द्र सिंह शेखावत ई शामिल व्ह्या। ई मौके वे कह्यो के भारत री संस्कृति मांय गुरू री ठौड़ सब ऊँ ऊंची मानी ज्यी है। गुरू पूर्णिमा, गुरूआं रा प्रति कृतज्ञता जतावण रो पर्व व्हेवण सागे गुरू-चेला री रीत ने आगे बधावण रो ई मौके देवे है। देवस्थान मंत्री जोराराम कुमावत पाली जिला रा बूसी अर बालराई मांय संतां रो मान कीनो। डूंगरपुर ज़िला रा साबला मांय संत मावजी महाराज री जन्मस्थली हरि मंदिर मांय ई मोटी तादाद मांय जातरू पूग्या। झुंझुनूं ज़िला रा चंचलनाथ टीला मांय गुरू पूर्णिमा महोत्सव मनायी ज्यो अर टीला परिसर मांय सोहवणी सजावट करी ज्यी। चूरू स्कूला काॅलेजां मांय गुरू पूर्णिमा रे मौके सम्मान समारोह राख्यी ज्या।