प्रवर्तन निदेशालय-ईडी री टीमां मंगलवार ने जयपुर समेत देशभर मांय 19 ठौड़ां कार्यवाही कीनी। ईडी री टीम जयपुर मांय राज्य रा पैली वाळा मंत्री प्रताप सिंह खाचरियावास रा रेहवास री तलाशी लीनी। रियल एस्टेट हलका मांय निवेश करण वाळी एक कंपनी मांय 48 हजार करोड़ रूप्या रा घोटाळा री शंका ऊं जुड़्या मामला मांय आ कार्यवाही करी ज्यी। श्री खाचरियावास रा रहवास माथे ई.डी. री कार्यवाही री जाण्कारी मिलता ई वां रा हिमायती लोग मोटी तादाद मांय मौके पूग र कार्रवाई रो विरोध कीनो अर सरकार रे खिलाफ नारा लगाया। हालात ने ध्यान राखता थकां मौका माथे तीन पुलिस थाणां रो ज़ाब्तो लगायी ज्यो। ईं दौरान खाचरियावास खुद घर ऊं बाहर निकळ र लोगां ने समझाया। खबरनवीसां सागे बातचीत करता थकां श्री खाचरियावास कह्यो के वां रो किण ई कंपनी ऊं कोई लेन-देन नी है।