प्रयागराज मांय चाल रह्या महाकुंभ मांय बुधवार ने मौनी अमावस रे मौके चार करोड़ ऊं बत्ता जातरु संगम मांय पवित्र स्नान कीनो। ईं सागे ई घाटां माथे अनुष्ठान अर पूजा-अर्चना करी ज्यी। दुनिया रो सब ऊं मोटो धार्मिक समागम 13 जनवरी ने सरु व्ह्यो हो। इण मांय पहलो अमृत स्नान 14 जनवरी ने संकरात रे मौके करी ज्यो हो। महाकुंभ मांय हाल तांई 24 करोड़ ऊं बत्ता जातरु पवित्र डुबकी लगा चुक्या है। ईं बीचे रेलवे महाकुंभ सारु चलायी जा रही कुछ खास गाड़ियां रद्द करण रा बारा मांय सोशल मीडिया माथे चाल रही खबरां ने गलत बतायी है। आकाशवाणी समाचार सागे बातचीत करता थकां रेलवे बोर्ड मांय सूचना अर प्रसार रा कार्यकारी निदेशक दिलीप कुमार आं खबरां ने गलत बतायी। वे कह्यो के मौनी अमावस रे मौके जातरूआं री मोटी तादाद ने ध्यान राखता थकां रेलवे 370 ऊं बत्ती गाड़ियां चला रही है। ईं बीचे महाकुंभ मांय संगम नोज़ माथे बीती रात भगदड़ रे कारण कुछ जातरूआं री मौत अर केई जातरूआं रे जख्मी व्हेवण री शंका है। राष्ट्रपति द्रौपदी मुर्मू हादसा ने दुखदायी बताता थकां मरण वाळां रा पिरवार वाळां रा प्रति संवेदना जतायी है। वे ज़ख्मी लोगां रे बेगा ई ठीक व्हेवण री कामना कीनी। प्रधानमंत्री नरेन्द्र मोदी ई हादसा रे कारण मरण वाळा रा पिरवार वाळां रा प्रति दुख जतायो है। वे कह्यो के वठे रो प्रशासन पीडित लोगां री हर संभव मदद कर रह्यो है। राज्यपाल हरिभाऊ बागडे़ अर मुख्यमंत्री भजनलाल लाल शर्मा ई हादसा माथे दुख जतायो है।