प्रयागराज मांय चाल रह्या महाकुंभ रा तैत गुरूवार ने गंगा पंडाल मांय सांस्कृतिक कार्यक्रम ‘‘संस्कृति का महाकुंभ’’ राख्यो जा रह्यो है। इण मांय नामी कलाकार सोहवणा कार्यक्रम पेश कर र भारत री संस्कृति री समृद्ध परम्परा रो दरसाव कर रह्या है। यमुना अर सरस्वती पंडालां मांय ई सांस्कृतिक कार्यक्रम राख्या जा रह्या है। महाकुंभ संस्कृति अर आध्यात्मिकता सागे पर्यावरण ने बचावण री ई पिछाण बण रह्यो है। 31 जनवरी ने हरित महाकुंभ राख्यो जावेला। ईं बीचे प्रदेश री जनता री महाकुंभ तांई पहुंच आसाण बणावण सारू रेलवे अर रोड़वेज री ओर ऊं खास व्यवस्थावां करी ज्यी है। रोड़वेज री ओर ऊं 12 जनवरी ऊं कुम्भ स्पेशल बसां चलायी जा रही है, जदके रेलवे ई शुक्रवार ऊं कोटा कने सोगरिया ऊं बनारस तांई खास गाड़ी चलावेला। 22 फरवरी तांई चालण वाळी आ गाड़ी सप्ताह मांय दो दिन शुक्रवार अर मंगलवार ने जावेला। सोगरिया ऊं आ गाड़ी शुक्रवार संवारे सवा आठ बज्यां रवाना व्हेला। कुम्भ ने ध्यान राखता थकां 19 जनवरी ऊं एक और गाड़ी बाड़मेर ऊं बरौनी बीचे चलाई जावेला। इण ऊं पैली गुरूवार ने जयपुर ऊं साबरमती बनारस स्पेशल रेलगाड़ी रवाना व्ही।