प्रधानमंत्री नरेन्द्र मोदी कह्या के विकसित भारत खातर मोटयारां ने शारीरिक रूप ऊँ स्वस्थ, मानसिक रूप ऊँ मजबूत अर आत्मविश्वासी व्हेणो जरूरी है। दीतवार ने नई दिल्ली मांय विकसित भारत खातर नशा-मुक्त युवा संकल्प अभियान री वर्चुअली शुरुआत करता थकां वे कह्या के युवांवां ने हमेशा नशा सूं दूर अर स्वस्थ जीवन-शैली आपणवणी चाहिजे। प्रधानमंत्री कह्या के नशा-मुक्ति खातर सौ हफ़्ता रो जन-भागीदारी अभियान शुरु कर्यो जा रह्या है जिण मांय देशभर मांय हर दितवार ने साप्ताहिक कार्यक्रम व्हेला। कार्यक्रम मांय, 28 हज़ार ठौड़ां सूं एक करोड़ सूं बत्ता युवा भाग लीना। इण मांय भारत अर राष्ट्रीय सेवा योजना रा स्वयंसेवका रे सागे स्कूल, कॉलेज, विश्वविद्यालय, युवा क्लब, गैर-सरकारी संगठन अर आध्यात्मिक संगठणा रा प्रतिभागी शामिल रह्या। राज्यपाल हरिभाऊ बागड़े दीतवार ने जयपुर रा सुबोध काॅलेज मांय राख्या कार्यक्रम मांय विकसित भारत संकल्प अभियान रे तैत नशामुक्त युवा री शपथ दिलाई। वणा छात्रां रे सागे प्रधानमंत्री रो सम्बोधन भी सुण्यो। वणा युवावां सूं नशामुक्त, अनुशासित अर विचारवान बणवा ने कह्या। मुख्यमंत्री भजन लाल शर्मा युवावां रे सागे उदयपुर रा नगर निगम आॅडिटोरियम मांय वीसी रे जरिये प्रधानमंत्री रा सम्बोधन ने सुण्या। इण मौके मुख्यमंत्री कह्या के राष्ट्र निर्माण मांय युवावां री महताऊ भूमिका है। मुख्यमंत्री कह्या के राज्य सरकार मोटयारा ने नशा सूं दूर रखबा खातर प्रभावी कदम उठा री है। उच्च शिक्षण संस्थानां मांय नशीला पदार्थां री रोकथाम खातर साढे तीन सौ सूं बत्ताा काॅलेजां मांय नई किरण नशामुक्ति केन्द्र थापित कर्या गया है। वे बताया के अभियान मांय चोखो योगदान देबा वाळा स्वयं सेवकां अर संगठनां ने 50 वां, 75 वां अर 100 वां सप्ताह रा पड़ाव माथे सम्मानित कर्या जावेला। इण दौरान मुख्यमंत्री युवावां ने नशा री लत सूं दूर रहबा रो संकल्प भी दिलायो। साथै ही नशामुक्त युवा फाॅर विकसित भारत यूथ आइकन पोस्टर रो विमोचन भी कर्यो। प्रदेश रा न्यारा-न्यारा ज़िलां मांय राख्या कार्यक्रम मांय बड़ी तादाद मांय मोटयार प्रधानमंत्री रा सम्बोधन ने वर्चुअली सुण्या। सिरोही रा आबूरोड रा ब्रह्माकुमारीज़ मुख्यालय शांतिवन परिसर मांय भी कार्यक्रम राख्या गया।