प्रधानमंत्री नरेन्द्र मोदी थावर ने बालोतरा ज़िला रा पचपदरा मांय देश रो पहलो ग्रीनफील्ड एकीकृत रिफाइनरी-कम-पेट्रोकेमिकल कॉम्प्लेक्स देश ने सूंप्यो। हिंदुस्तान पेट्रोलियम कॉर्पाेरेशन लिमिटेड अर राज्य सरकार कानी ऊं मिल र 79 हजार 450 करोड़ रुप्या ऊं बत्ता खर्च ऊं बणायी ज्यी ईं रिफाइनरी मांय सालाना 90 लाख मीट्रिक टन काचो तेल साफ कर्यो जावेला। ईं मौके प्रधानमंत्री 1 लाख 5 हजार करोड़ रुप्या रा खर्च वाळा पेट्रो केमिकल्स, शहरी परिवहन, रेलवे, सड़क, नवीकरणीय ऊर्जा, बिजली अर जयपुर मेट्रो रेल परियोजना रा दूजा चरण रा कामां री सरूआत कीनी अर पूरा व्ह्या काम जनता ने सूंप्या। वे चूरू-सादुलपुर अर चूरू-रतनगढ रेलवे लेण ने दोवडी बणावण री परियोजना अर नेशनल हाईवे नम्बर 125 ए, जोधपुर रिंग रोड खण्ड-दो ने चार लेन री बणावण रा काम री ई सरूआत कीनी। श्री मोदी एक हजार मेगावाॅट बूता वाळी बीकानेर सौर ऊर्जा परियोजना ई जनता ने सूंपी। प्रधानमंत्री राजस्थान नवीकरणीय ऊर्जा हलका ऊं बिजली निकासी सारू 1 हजार 900 करोड़ रुप्या ऊं बत्ता खर्च ऊं बणायी ज्यी ट्रांसमिशन लाइन रो ई उद्घाटन कीनो। ईं मौके प्रधानमंत्री कह्यो के आ परियोजना विकसित अर खुद रे पाण ऊबो भारत बणावण री दिशा मांय खास कदम है। वे कह्यो के तेल साफ करण रा ईं कारखाना ऊं प्रदेश मांय मोकळा लोगां सारू नौकरी-धंधा रा मौका बणेला अर औद्योगिक विकास और तेज़ व्हेला।
श्री मोदी कह्यो के पश्चिम एशिया संकट रे बावजूद भारत टेमसर करी ज्या फैसलां, असरदार रणनीति, साधनां रा संतुलित उपयोग अर मजबूत कूटनीति रे पाण ईं चुनौती रो कामयाबी सागे सामो कीनो। वे कह्यो के दुनिया रा केई देश ईंधन री परेशानी ऊं झूझ रह्या हा, वां बगत ई भारत आगे री सोच ऊं नीति अपना र देश री ऊर्जा हिफाज़त तैय कीनी।
प्रधानमंत्री कह्यो के भारत तेल साफ करण रा बूता ने लगातार बधावण सागे आज दुनिया रो रिफाइनिंग बूता वाळो चैथो मोटो देश बण ग्यो है।

श्री मोदी कह्यो के सरकार दुनिया मांय तेल-गैस रा संकट बीचे रसोई गैस रा मोल माथे काबू राखण मांय कामयाबी हासिल कीनी। जळसा रे दौरान श्री मोदी नुवी सरकारी नौकरी लागण वाळा नौजवानां ने नौकरी लागण रा कागज़ात सूंप्या। ईं मौके वे रसोई गैस भर्या टैंकर ई रवाना कीना। प्रधानमंत्री रिफाइनरी री मेन कंट्रोल यूनिट रो दौरो कर र काचा तेल ने साफ करण री प्रक्रिया, तकनीक अर उत्पादां री जाणकारी लीनी। प्रधानमंत्री एक पेड़ मां के नाम अभियान रा तैत रिफाइनरी परिसर मांय खेजड़ी रो पौधो ई रोप्यो। कार्यक्रम मांय मुख्यमंत्री भजनलाल शर्मा प्रधानमंत्री रो आभार जताता थकां तेल साफ करण रा कारखाना रा उद्घाटन ने राजस्थान सारू माथो ऊंचो करण वाळो बतायो। श्री शर्मा कह्यो के प्रधानमंत्री नरेन्द्र मोदी री अगुवाई मांय पूरो देश अर राजस्थान लगातार विकास कर रह्यो है।
कार्यक्रम मांय राज्यपाल हरिभाऊ बागड़े, पेट्रोलियम अर प्राकृतिक गैस मंत्री हरदीप सिंह पुरी, उपमुख्यमंत्री दिया कुमारी अर डॉ. प्रेमचंद बैरवा समेत केई मंत्री, जनता रा नुमाइंदा अर मोटी तादाद मांय जनता मौजूद रही। इण ऊं पैली प्रधानमंत्री जोधपुर मांय हवाई अड्डा रा नुवा टर्मिनल भवन रो उद्घाटन कीनोर्। इं मौके वे संशोधित उड़ान योजना री ई सरूआत कीनी। 28 हजार 840 करोड़ रुप्या री ईं योजना रो मकसद आवता 10 साल मांय जनता ने हवाई सेवा मुहैया करावणो है। कार्यक्रम मांय नागर विमानन मंत्री किंजरापु राम मोहन नायडू अर केन्द्रीय संस्कृति अर पर्यटन मंत्री गजेन्द्र सिंह शेखावत ई मौजूद रह्या।