प्रधानमंत्री नरेन्द्र मोदी रो थावर ने बालोतरा जिला रा पचपदरा मांय देश रा पहला ग्रीनफील्ड रिफाइनरी-कम-पेट्रोकेमिकल कॉम्प्लेक्स ने जनता ने सूंपण रो कार्यक्रम है। वे बालोतरा ऊँ विकास री एक लाख छह हजार करोड़ रुप्या ऊँ बत्ता खर्च वाळी न्यारी-न्यारी परियोजनावां रा उद्घाटन करण सागे नुवी परियोजनावां रा कामां री सरूआत करेला। म्हाणा खबरनवीस बतायो के आ मांय रेलवे, सड़क, ऊर्जा अर शहरां मांय आवण-जावण रा सुबीता ऊँ जुड़ी न्यारी-न्यारी परियोजनावां शामिल है। इण ऊँ पैली प्रधानमंत्री जोधपुर हवाई अड्डा रा नुवा टर्मिनल भवन रो उद्घाटन करेला। 480 करोड़ रुप्या रा खर्च ऊँ बणायी ज्यो नुवो टर्मिनल भवन सालाना 20 लाख मुसाफिरां री आवाजाही ने ध्यान राखता थकां डिजाइन करी ज्यो है। श्री मोदी जोधपुर मांय संशोधित उड़ान योजना री सरुआत ई करेला। ईं योजना रो मकसद देश मांय हवाई जुडाव ने और बेहतर बणावणो है। प्रधानमंत्री चूरू-सादुलपुर अर चूरू-रतनगढ बीचे रेलां री पटरियां दोवड़ी बणावण री परियोजना सागे जोधपुर रिंग रोड रा दूजा हिस्सा माथे चार लेण री सड़क बणावण रा काम री ई सरूआत करेला। वे एक हजार मेगावाॅट बूता री बीकानेर सौर ऊर्जा परियोजना ई जनता ने सूंपेला। प्रधानमंत्री रा राज्य रा प्रस्तावित दौरा ने ध्यान राखता थकां मुख्यमंत्री भजन लाल शर्मा रो पचपदरा रिफाईनरी रो दौरो कर र काल व्हेवण वाळा जळसा री तैयारियां रो जायजो लेवण रो कार्यक्रम है। इण ऊँ पैली जोधपुर मांय खबरनवीसां सागे बातचीत करता थकां वे कह्यो के पचपदरा मांय तेल साफ करण रा कारखाना ऊँ प्रदेश रो विकास और तेज़ व्हेला। मुख्य सचिव वी. श्रीनिवास अर पुलिस महानिदेशक राजीव शर्मा समेत न्यारा-न्यारा आला अहलकार आज जोधपुर अर बालोतरा रो दौरो कीनो। ध्यानजोग है के प्रधानमंत्री पैली 21 अप्रैल 2026 ने पचपदरा मांय एचपीसीएल राजस्थान रिफाइनरी रो उद्घाटन करण वाळा हा, पण उद्घाटन रा एक दिन पैली रिफाइनरी रा एक हिस्सा मांय लाय लाग जावण रे कारण कार्यक्रम टाळ दियो ज्यो हो। करीब 80 हजार करोड़ रूप्या रा खर्च ऊँ बणायी ज्या तेल साफ कारण रा ईं कारखाना मांय सालाना 9 मीट्रीक टन काचो तेल साफ कर्यो जावेला। ओ तेल देश मांय पूर्ति सागे दुनिया रा 40 देशां मांय ई बेचो जावेला। ईं कारखाना मांय बणबा वाळा दूजा छोटा-मोटा उत्पादां माथे आधारित सहायक उद्योग लगावण सारू राजस्थान पेट्रो ज़ोन विकसित करी ज्यो है। इण ऊँ कारोबारी सीधा रिफाइनरी ऊँ काचो माल ले सकेला। तेल साफ करण रा ई कारखानां ऊँ एक लाख 35 हजार ऊँ बत्ता लोगां ने सीधा या परोक्ष रूप ऊँ काम-धंधो मिलेला।