मुख्यमंत्री भजनलाल शर्मा बुधवार ने जयपुर रा सांगानेर विधानसभा हलका मांय विकास रा 631 करोड़ रुप्या ऊं बत्ता खर्च वाळा कामां री सरूआत कीनी अर पूरा व्ह्या काम जनता ने सूंप्या। ईं मौके राख्यी ज्या कार्यक्रम मांय मुख्यमंत्री नाळियां री सफाई सारू सुपर सकर मशीन, कचरो भेळो करण री नुवी मैकेनिकल लिटर पिकर मशीन ने रवाना कीनी। स्वच्छ सर्वेक्षण-2026 रा बारा मांय जाग जगावण रा मकसद ऊं ब्रांडिंग ऑटोरिक्शा ने ई हरी झंडी बता र रवाना कीना। श्री शर्मा पात्र लोगां ने जमीं रा हक वाळा स्वामित्व कार्ड ई दीना। कार्यक्रम मांय मुख्यमंत्री कह्यो के सरकार राजधानी जयपुर रा विकास सारू लगातार काम कर रही है। वे बतायो के प्रधानमंत्री नरेन्द्र मोदी चार जुलाई ने जयपुर मेट्रो रेल परियोजना रा दूजा दौर रा काम री सरूआत करेला। शहरी अर ग्रामीण सेवा शिविरां रो जिक्र करतां थकां मुख्यमंत्री कह्यो के ऐ शिविर जनता री परेशानियां तुरत आगी करण रा जरिया बण रह्या है। कार्यक्रम मांय संसदीय कार्य मंत्री जोगाराम पटेल, नगरीय विकास मंत्री झाबर सिंह खर्रा अर जयपुर री सांसद मंजू शर्मा समेत जनता रा केई नुमाइंदा अर मोटी तादाद मांय जनता मौजूद रही।