प्रधानमंत्री नरेन्द्र मोदी कह्यो है के वां रा राज मांय नौकरी-धंधा रा नुवां मौका बणावण सारू केई योजनावां चलायी ज्यी है अर व्यवस्था मांय जरूरी बदलाव करी ज्या है। प्रधानमंत्री पीएम विकसित भारत रोजगार योजना रा तैत शुक्रवार ने करीब 2 हजार 400 करोड़ रुप्या री रकम जारी कीनी। ईं मौके श्री मोदी कह्यो के नौजवानां अर उद्योगां रे एके सागे आगे बधबा ऊँ नौकरी-धंधा रा मौका बधे है। श्री मोदी केन्द्र सरकार कानी ऊँ लारला दस साल मांय चलायी ज्यी न्यारी-न्यारी योजनावां रो जिक्र करता थकां कह्यो के अ योजनावां मोटी तादाद मांय नौकरी-धंधा रा मौका बणाया। प्रधानमंत्री कह्यो के आ योजना नौजवानां अर उद्योगां बीचे मजबूत पुल रो काम कर रही है। वे नौजवानां सागे बातचीत ई कीनी। जयपुर, जोधपुर, उदयपुर, कोटा, अलवर, पाली अर भीलवाड़ा समेत आखा देश मांय 200 ठौड़ां क्षेत्रीय कार्यक्रम ई राख्यी ज्यी। जयपुर मांय व्ह्या राज्य स्तर रा कार्यक्रम मांय मुख्यमंत्री भजनलाल शर्मा ई शिरकत कीनी।