प्रधानमंत्री नरेन्द्र मोदी सोमवार ने परीक्षा पे चर्चा कार्यक्रम रा आठवां संस्करण मांय विद्यार्थियां सागे बातचीत कीनी। वे पूरा विकास माथे जोर देता थकां विद्यार्थियां ऊं परीक्षा रे दौरान तनाव अर चिंता माथे काबू करण रा बारा मांय बात कीनी। प्रधानमंत्री क्रिकेट मैच री मिसाल देता थकां कह्यो के ज्यां बल्लेबाज़ दवाब री परवाह नीं कर र पूरो ध्यान गेंद माथे राखे है, वां ई भांत विद्यार्थियां ने ई परीक्षा रा दबाव ने दूर राखता थकां ध्यान पढ़ाई मांय लगावणो चाहिजे। प्रधानमंत्री पोषण अर आरोग्य रा महत्त्व रो जिक्र करता थकां विद्यार्थियां ने स्वस्थ रेहवण सारू मोटा अनाज अर तरकारियां खावण री राय दीनी। प्रधानमंत्री कह्यो के नींद पोषण माथे निर्भर है। प्रधानमंत्री विद्यार्थियां ने परीक्षा रा दबाव ऊं दूर रह र तैयारी करण अर खुद ने चुनौती देता रेहवण री राय ई दीनी। प्रदेश मांय ई प्रधानमंत्री रा परीक्षा पे चर्चा कार्यक्रम ने उमाव सागे देख्यो अर सुणी ज्यो। स्कूलां मांय प्रधानमंत्री रा ईं कार्यक्रम ने बतावण अर सुणावण सारू व्यवस्थावां करी ज्यी। झालावाड़ रा केन्द्रीय विद्यालय मांय राख्यी ज्या कार्यक्रम मांय बच्चां खास उमाव सागे सिरकत कीनी। जालौर री स्कूलां अर मदरसां मांय ई परीक्षा पे चर्चा कार्यक्रम ने देखण सुणबा सारू विद्यार्थियां मांय उमाव निजर आयो। सागाना री सीनियर सैकण्डरी स्कूल मांय करियर मेळो लगायी ज्यो। सरहदी ज़िला बाड़मेर री न्यारी-न्यारी स्कूलां मांय ई विद्यार्थी अर शिक्षक पूरा उमाव सागे ओ कार्यक्रम सुण्यो सवाईमाधोपुर रा पीएम श्री केन्द्रीय विद्यालय री काव्या जैन बतायो के प्रधानमंत्री रा परीक्षा पे चर्चा कार्यक्रम ऊं वां सरीखा केई विद्यार्थियां मांय परीक्षा रो तनाव कम व्हे है। पाली ज़िला रा महात्मा गांधी राजकीय विद्यालय नाडोल मांय ई विद्यार्थी प्रधानमंत्री री सलाह अर सुझाव अपनावण रो संकल्प लीनो। ई मौके स्कूल मांय करियर मेळो ई लगायी ज्यो। हनुमानगढ़ ज़िला मांय टिब्बी री महात्मा गांधी स्कूल मांय राख्यी ज्या करियर मेळा मांय विद्यार्थियां ने न्यारी-न्यारी स्टॉलां रे जरिये करियर रा बारा मांय जाणकारी दीरीजी। टिब्बी रा उपखण्ड अधिकारी सत्यनारायण सुथार बतायो के मेळा मांय खुद रा नौकरी धंधा रा बारा मांय लगायी ज्यी स्टॉल माथे खास ध्यान रह्यो। प्रदेश रा न्यारा-न्यारा ज़िलां ऊं प्रधानमंत्री रा परीक्षा पे चर्चा कार्यक्रम ने उमाव सागे देखण अर सुणबा रा समाचार है।