प्रधानमंत्री नरेन्द्र मोदी कया के संविधान म्हाको मार्गदर्शक है, या बडा गर्व री बात है के भारतीय संविधान रा आवता बरस 26 जनवरी ने 75 बरस पूरा व्हे रिया है। आकाशवाणी माथे मन की बात कार्यक्रम मांय राष्ट्र ने संबोधित करता थकां श्री मोदी कया के संविधान समय री हर कसौटी माथे खरो उतर्यो है। वे कया के इण बरस संविधान दिवस रे मौके केई गतिविधियां सरू व्ही है, जो पूरा बरस चालती रहवेला। श्री मोदी कया के संविधान री विरासत सूं नागरिकां ने जोड़बा खातर ूूण्बवदेजपजनजपवद75ण्बवउ रा नाम सूं एक खास वेबसाइट बणायी गई है। वणां मन की बात रा श्रोतावां, टाबरां अर मोट्यारा ने या वेबसाइट देखबा ने कया।
श्री मोदी कया के आवता बरस 13 जनवरी सूं प्रयागराज मांय महाकुंभ होबा जा रियो है अर इण खातर संगम तट माथे जोरशोर सूं तैयारियां चाल री है। प्रधानमंत्री कया के महाकुंभ री विशेषता इण री विशालता रे सागे इण री विविधता भी है। वे कया के कुंभ एकता रो महाकुंभ भी है। श्री मोदी लोगां सूं महाकुंभ मांय भाग ले र एकता रा संकल्प ने मजबूत करबा ने कया।
प्रधानमंत्री कया के भारतीय एनीमेशन फिल्मां, रेगुलर फिल्मां अर टीवी सीरियलां री लोकप्रियता दिखावे है के भारत री क्रिएटिव इंडस्ट्री मांय कित्तो दम है। एनीमेशन बाबत श्री मोदी खुशी जताई के कृष, तृष अर बाल्टीबॉय, बच्चां मांय एक सुपरहिट एनीमेशन सीरीज है जिण रो दूजो सीजन बड़ा ही खास अंदाज मांय गोवा मांय अंतर्राष्ट्रीय भारतीय फिल्म महोत्सव मांय सरू व्हीयो हो। इण ने दूरदर्शन रे सागे दूजा ओटीटी प्लेटफॉर्म माथे देख्यो जा सके है। आकाशवाणी सूं इण सीरीज रो प्रसारण हरेक दीतवार ने सुंवारे साढ़े दस बज्यां करयो जावे है।
प्रधानमंत्री कया के विश्व स्वास्थ्य संगठन री रपट रे मुजब बरस 2015 सूं 2023 रे दौरान भारत मांय मलेरिया रा मामला अर इण वजह सूं व्ही मौतां मांय अस्सी फीसदी तांई री कमी आई है। श्री मोदी मलेरिया री रोकथाम करबा खातर हरियाणा रा कुरूक्षेत्र जिला रा मॉडल री भी सरावणा करी।
प्रधानमंत्री विश्व री प्रसिद्ध चिकित्सा पत्रिका लेंसेट री बातां भी साझा करी, जिण रे मुजब भारत मांय कैंसर रो ईलाज टेम माथे सरू करबा री संभावना काफी बढ ग्यी है। वे कया के टेम माथे ईलाज सरू करबा रो मतलब है के तीस दिन रे भीतर कैंसर रोगी रो ईलाज सरू व्हे जावे। इण माथे आयुष्मान भारत योजना बडी भूमिका निभाई है। इण योजना री वजह सूं 90 फीसदी कैंसर रोगियां रो ईलाज टेम माथे सरू व्हे सक्यो है।
प्रदेश री न्यारी-न्यारी ठोडां माथे प्रधानमंत्री नरेन्द्र मोदी रा मन की बात कार्यक्रम ने उच्छाव रे सागे सुण्यो गयो। मुख्यमंत्री भजन लाल शर्मा जयपुर मांय आपरा निवास माथे मन की बात कार्यक्रम सुण्या। इण दौरान राज्य मंत्रिमंडल रा केई सदस्य अर केई विधायक मौजूद रिया। किशनगढ मांय केंद्रीय कृषि राज्य मंत्री भागीरथ चौधरी आपरा रेहवास माथे कार्यकर्तावां रे सागे मन की बात कार्यक्रम सुण्या। बारां जिला रा सगळा मंडलां रा बूथ अर शक्ति केन्द्रां माथे भाजपा कार्यकर्ता अर पदाधिकारी मन की बात कार्यक्रम सुण्या।