प्रधानमंत्री नरेंद्र मोदी हाइड्रोजन ऊं चालण वाळी देश री पहली रेलगाड़ी ने शुक्रवार ने हरियाणा मांय जींद ऊं रवाना कीनी। आ गाड़ी जींद-सोनीपत बीचे चलायी जा रही है। ईं मौके प्रधानमंत्री 12 हजार 470 करोड़ रुप्या ऊँ बत्ता खर्च वाळी नेशनल हाई-वे परियोजनावां री सरूआत कीनी अर पूरा व्ह्या काम जनता ने सूंप्या। ईं मौके प्रधानमंत्री कह्यो के लारला 12 साल मांय रेलवे मांय खास बदलाव करी ज्या। श्री मोदी कह्यो के 21वीं सदी री रेल व्यवस्था हाइड्रोजन प्रौद्योगिकी ऊं चालेला। प्रधानमंत्री कह्यो के मौजूदा दौर मांय दुनिया रा केवल तीन-चार देशां कने ई हाइड्रोजन ट्रेन चलावण रो बूतो है। ईं सागे ही भारत हाइड्रोजन ऊँ रेल चलावण वाळो पांचवों देश बण ग्यो है। हाल तांई जर्मनी, जापान, चीन अर अमरीका मांय ही ओ सुबीतो है। दस डिब्बां वाळी ईं रेलगाड़ी मांय दो हजार छः सौ मुसाफिर सफर कर सके है। दूजा देशां मांय हाइड्रोजन ऊँ चलायी जावण वाळी रेलगाड़ियां मांय दो या तीन डिब्बा व्हे है। प्रधानमंत्री कह्यो के 3 हजार 200 हॉर्सपावर बूता वाळी भारत री हाइड्रोजन ट्रेन दुनिया री सब ऊं ताकतवर अर हाइड्रोजन ऊं चालण वाळी लम्बी रेलगाड़ियां मांय शामिल है।
ईं मौके रेल मंत्री अश्विनी वैष्णव हाइड्रोजन ऊं चालण वाळी नमो ग्रीन रेलगाड़ी री सरुआत ने देश री तकनीकी बरकत मांय ऐतिहासिक उपलब्धि बतायो। श्री वैष्णव कह्यो के आ गाड़ी पूरी तरह पर्यावरण अनुकूल है अर इण मांय डीजल री ज़रुरत नी है।
प्रधानमंत्री शुक्रवार ने चंडीगढ़ मांय स्वास्थ्य, भणाई-लिखाई अर सड़क हलकां ऊँ जुड़ी विकास री करीब चार हजार सात सौ करोड़ रुप्या री परियोजनावां री सरूआत कीनी। ईं पाछे श्री मोदी देशभर मांय और बेहतर बणायी ज्यी 75 रेलवे टेशनां रो पंजाब रा जालंधर कैंट ऊँ वर्चुअल तरीका ऊँ उद्घाटन कीनो। आं मांय प्रदेश रा जैसलमेर, बाड़मेर, दौसा, डीग, गंगापुरसिटी, गोटन, खेरथल अर सोमेसर ई शामिल है। आं टेशनां माथे राख्यी ज्या कार्यक्रमां मांय ई वठे रा जनता रा नुमाइन्दा, अहलकार अर मोटी तादाद मांय लोग भेळा व्ह्या।
मुख्यमंत्री भजनलाल शर्मा ई नागौर ज़िला रा गोटन रेलवे टेशन माथे राख्यी ज्या कार्यक्रम मांय शामिल व्ह्या। ईं मौके श्री शर्मा कह्यो के ओ विकसित भारत बणावण रो संकल्प साचो करण री दिशा मांय खास कदम है।