प्रधानमंत्री नरेंद्र मोदी मंगलवार ने धन्वंतरि जयंती अर 9वां आयुर्वेद दिवस रे मौके स्वास्थ्य हलका ऊं जुड़ी करीब 12 हजार 850 करोड़ रुप्या रा खर्च वाळी न्यारी-न्यारी परियोजनावां रो उद्घाटन कीनो अर नींव रखी। प्रधानमंत्री आयुष्मान भारत प्रधानमंत्री जन आरोग्य योजना रा तहत 70 साल अर इण ऊं बत्ती उम्र वाळां बुजुर्गां सारू स्वास्थ्य कवरेज रा सुबीता री सरूआत ई कीनी। ईं योजना रा तहत 70 साल अर इण ऊं बत्ती उम्र वाळां बुजुर्गां ने अब 5 लाख रूप्या रा खर्च तांई रो ईलाज मुफ्त मिलेला। कार्यक्रम मांय पीएम आयुष्मान भारत हैल्थ इन्फ्रास्ट्रक्चर मिशन रा तहत प्रदेश मांय ई 8 क्रिटिकल केयर ब्लॉक्स री वर्चुअल तरीका ऊं नींव रखी ज्यी। ईं मौके प्रधानमंत्री कह्यो के केन्द्र सरकार देश रा चरित्र अर सामाजिक ताना-बाना री आत्मा ‘सर्वे सन्तु निरामयः’ ने आधार मानता थकां सबका साथ-सबका विकास री सोच सागे काम कर रही है। मुख्यमंत्री भजनलाल शर्मा ईं कार्यक्रम ऊं भरतपुर रा आरबीएम अस्पताल सागे वीडियो कॉन्फ्रेंस रे मार्फत जुड़्या। वे कह्यो के आज देश मांय स्वास्थ्य रा हलका मांय नुवी क्रांति री सरूआत व्ही है। वे कह्यो के 70 साल अर इण ऊं बत्ती उम्र वाळां बुजुर्गां ने 5 लाख रूप्या तांई रा खर्च रो ईलाज मुफ्त मिलेला, जिण ऊं वे ईलाज सारु किण ई माथे निर्भर नी रेहवेला। मुख्यमंत्री कह्यो के पीएम आयुष्मान भारत हैल्थ इन्फ्रास्ट्रक्चर मिशन रा तहत आज प्रदेश रा भरतपुर, धौलपुर, चूरू, बूंदी, चित्तौड़गढ़, सिरोही, करौली अर हनुमानगढ़ रा जिला अस्पताल अर मेडिकल कॉलेजां मांय क्रिटिकल केयर ब्लॉक बणावण रा काम री नींव रखी ज्यी। वे कह्यो के आईसीयू बिस्तर, ऑक्सीजन, वेंटीलेशन अर ऑपरेशन थियेटर समेत न्यारा-न्यारा सुबीतां वाळा अ ब्लॉक बण जावण ऊं प्रदेश मांय आपातकालीन चिकित्सा सुबीता मजबूत बणेला। वे कह्यो के राज्य सरकार ई स्वास्थ्य ऊं जुड़्या सुबीता और बेहतर बणावण बाबत् काम कर रही है। उपमुख्यमंत्री दिया कुमारी आयुष्मान भारत प्रधानमंत्री जन आरोग्य योजना रा तहत करौली मांय क्रिटिकल यूनिट री नींव रखण रा कार्यक्रम मांय सिरकत कीनी। ईं मौके सांसद भजनलाल जाटव, विधायक दर्शन सिंह गुर्जर अर हंसराज मीणा ई मौजूद रह्या। चित्तौडगढ़ रा मेडिकल कॉलेज मांय राख्यी ज्या कार्यक्रम मांय उपमुख्यमंत्री प्रेमचन्द बैरवा ई सिरकत कीनी। प्रधानमंत्री देश रा पहला अखिल भारतीय आयुर्वेद संस्थान रा दूजा चरण रो ई उद्घाटन कीनो। सिरोही मांय एम्स जोधपुर री स्वास्थ्य सेवावां री ड्रोन डिलीवरी सेवा रो उद्घाटन ई करी ज्यो। कार्यक्रम मांय विधायक समाराम गरासिया अर मोतीलाल कोली ई मौजूद रह्या। आज ईं धन्वंतरि जयंती रे मौके प्रदेश मांय न्यारा-न्यारा कार्यक्रम राख्यी ज्या। सवाईमाधोपुर मांय आयुर्वेद विभाग री ओर ऊं आयुर्वेद रा जनक भगवान धन्वंतरि री विधि-विधान सागे पूजा-अर्चना करी ज्यी अर बेहतरीन काम करण वाळा वैद्य्यां रो मान करी ज्यो।