प्रदेश री सात विधानसभा सीटां माथे उपचुनाव सारु वोट देवण रो काम बुधवार सिंज्यां पूरो व्हे ग्यो। दौसा, रामगढ, झुंझुनू, चौरासी, खींवसर, देवली-उनियारा अर सलूंबर विधानसभा हलकां मांय उपचुनाव सारु वोट देवण रो काम सिंज्यां छह बजां तांई चाल्यो, हालांकि तैय बगत तांई मतदान केंद्रां मांय दाखिल व्हेवण वाळा मतदातावां ने वोट देवण री मंजूरी दीरीजी। निर्वाचन विभाग ऊं मिली जाणकारी रे मुजब सात ई चुणाव हलकां मांय सिज्यां 5 बजां तांई 64 दशमलव आठ दो फीसदी वोट पड़्या। खींवसर मांय 71 दशमलव शून्य चार, देवली-उनियारा मांय 60 दशमलव छह एक अर सलूम्बर मांय 64 दशमलव एक नौ फीसदी वोट पड़्या। दौसा मांय 55 दशमलव छह तीन फीसदी, रामगढ़ मांय 71 दशमलव चार पांच, झुंझुनू मांय 61 दशमलव 8 अर चौरासी मांय 68 दशमलव पांच पांच फीसदी वोट पड़्या। छुटपुट घटनावां ने छोड़ र घणखर ठौड़ां शांति ऊं वोट पड़बा रा समाचार है। मतदातावां मांय वोट देवण सारु उमाव निजर आयो। केई ठौड़ां बींद-बींदणी देवउठनी ग्यारस रे मौके व्ह्या ब्याह पाछे वोट देवण ने पूग्या। दौसा ज़िला मांय कालोता मतदान केंद्र परां तीन बींद एके सागे वोट देवण ने आया। दौसा मांय ई कुछ मतदान केंद्रां माथे महिलावां लोकगीत गाती थकीं मतदान केंद्र पूगी। डूंगरपुर ज़िला रा सीमलवाड़ा मांय पर्यावरण री हिफ़ाज़त रो संदेश देवण वाळो मतदान केंद्र बणायी ज्यो। देवली-उनियारा विधानसभा हलका रा समरावता गांव रा मतदान केंद्र मांय निर्दलीय उम्मीदवार नरेश मीणा उपखंड अधिकारी सागे मारपीट कीनी ज्यीं पाछे वठे हंगामो व्हे ग्यो। टोंक री जिला निर्वाचन अधिकारी सौम्या झा बतायो के समरावता मांय गांव वाळा वां रा गांव ने देवली री बजाय उनियारा तहसील मांय जोड़बा री मांग करता थकां वोट देवण रा काम रो बहिष्कार कर र धरनो दे रह्या हा। वां सागे निदर्लीय उम्मीदवार ई मौजूद हा। नरेश मीणा बूथ माथे जा र एरिया मजिस्टेट अर मालपुरा रा एसडीएम अमित चौधरी सागे मारपीट कीनी। वे बतायो के मामला री जांच करी जा रही है अर जांच रपट रे मुजब कानूनी कार्यवाही सारू आगे लिख्यो जावेला। दूजी कानी आरएएस एसोसिएशन रा नुमाइंदां रो एक दल मुख्य निर्वाचन अधिकारी नवीन महाजन सागे मुलाकात कर र घटना री निंदा कीनी अर आरोपित रे खिलाफ कार्रवाही री मांग कीनी। वोटां री गिणती 23 नवम्बर ने करी जावेला।