प्रदेश री सात विधानसभा सीटां माथे 13 नवम्बर ने व्हेवण वाळा उपचुनाव सारू सोमवार ने सिंज्यां प्रचार रो काम पूरो व्हे ग्यो। प्रचार रा आखिरी दिन सोमवार ने कांग्रेस अर भाजपा समेत न्यारी-न्यारी सियासी पार्टियां रा नेता उम्मीदवारां रा प्रचार सारू पूरो जोर लगा दीनो। मुख्यमंत्री भजन लाल शर्मा चौरासी अर सलूंबर मांय भाजपा रा उम्मीदवारां री हिमायत मांय विजय संकल्प सभावां ने सम्बोधित कीना। वे कह्यो के भाजपा आदिवासियां रा भला सारू लगातार काम कर रही है, जदके कांग्रेस रो आदिवासियां रा भला ऊं कोई लेणा-देणो नी है। मुख्यमंत्री कह्यो के राज्य सरकार वागड़ हलका रा विकास माथे खास ध्यान दे रही है। वे प्रदेश मांय बेरोज़गार नौजवानां रा भला सारू करी ज्या जतन री चर्चा करता थकां कह्यो के राज्य मांय राज्य मांय सरकारी नौकरियां सारू अब टेमसर अर साफगोई सागे भर्तियां व्हेला। भाजपा रा केई आला नेता अर राज्य सरकार मांय मंत्री ई पार्टी रा उम्मीदवारां रो प्रचार कीनो। दूजी कानी विधानसभा मांय विपख रा नेता टीकाराम जूली रामगढ विधानसभा हलका मांय न्यारी-न्यारी ठोडां चुनावी सभावां ने सम्बोधित कीना। कांग्रेस पार्टी रा केई और नेता ई पार्टी रा उम्मीदवारां रो प्रचार कीनो। खींवसर मांय राष्ट्रीय लोकतांत्रिक पार्टी रा संयोजक हनुमान बेनीवाल अर चौरासी मांय भारत ट्राइबल पार्टी रा सांसद राजकुमार रोत आप-आप री पार्टी रा उम्मीदवारां सारू न्यारी-न्यारी ठोड़ां नुक्कड़ सभावां अर जनसंपर्क कीनो। चुनाव प्रचार रो काम पूरो व्ह्यां पाछे अब उम्मीदवार घर-घर जा र प्रचार कर सकेला। मंगलवार ने संवारे पोलिंग पार्टियां री रवानगी सरू व्हे जावेला। बुधवार ने दौसा, रामगढ़, झुंझुनू, चौरासी, खींवसर, देवली-उनियारा अर सलूम्बर विधानसभा हलकां मांय उपचुनाव सारू संवारे 7 ऊं सिंज्या 6 बज्यां तांई वोट पड़ेला।