प्रदेश री सात विधानसभा सीटां माथे उपचुनाव सारू सगळी पार्टियां अर उम्मीदवार प्रचार मांय पूरो ज़ोर लगा रह्या है। मुख्यमंत्री भजनलाल शर्मा थावर ने झुंझुनू अर खींवसर मांय भाजपा रा उम्मीदवारां री हिमायत मांय जनसभावां ने सम्बोधित कीनी। खींवसर री जनसभा मांय वे कह्यो के प्रदेश मांय भाजपा रा मौजूदा राज मांय जो वायदा करी ज्या है, वां माथे तेज़ी ऊं काम कर्यो जा रह्यो है। मुख्यमंत्री कह्यो के पेपरलीक रे जरिये नौजवानां री जिन्दगी सागे खिलवाड़ करण वाळां रे खिलाफ लगातार कार्रवाई करी जा रही है। मुख्यमंत्री कह्यो के लारला ग्यारह महीनां मांय व्ह्या सगळा इम्तेहान पूरी साफ गोई सागे करायी ज्या। उप मुख्यमंत्री दिया कुमारी थावर ने सलूंबर मांय भाजपा रा उम्मीदवार रा समर्थन मांय जनसभा ने संबोधित कीनी अर रोड़ शो कीनो। भाजपा रा आला नेता डॉ. सतीश पूनिया देवली-उनियारा मांय पार्टी रा उम्मीदवार रा समर्थन मांय न्यारी-न्यारी ठौड़ां सभावां कीनी। दूजी कानी कांग्रेस रा प्रदेश अध्यक्ष गोविंद सिंह डोटासरा खींवसर मांय पार्टी रा प्रत्याशी रा समर्थन मांय रैली ने संबोधित करता थकां राज्य री भाजपा सरकार माथे लारली कांग्रेस सरकार री बगत सरू करी ज्यी केई चोखी योजनावां बंद करण रो आरोप माण्ड्यो। विधानसभा मांय विपख रा नेता टीकाराम जूली रामगढ मांय कांग्रेस रा उम्मीदवार रा समर्थन मांय के ठौड़ां जनसंपर्क कीनो। राष्ट्रीय लोकतांत्रिक पार्टी रा संयोजक हनुमान बेनीवाल ई थावर ने खींवसर मांय केई गांवां रो दौरो कर र पार्टी रा उम्मीदवार रा समर्थन मांय नुक्कड़ सभावां ने संबोधित कीनी।
निर्वाचन विभाग विधानसभा उपचुनाव रे दौरान वेबकास्ट करवरेज रो दायरो और बधा दीनो है। अब वोट देवण रा कमरा रा बाहर ऊं ई लाइव कवरेज करी जावेला। मुख्य निर्वाचन अधिकारी नवीन महाजन आ जाणकारी दीनी। वे बतायो के मतदान केंद्रां माथे और कैमरा लगाया जावेला अर लाइव स्ट्रीमिंग री निगराणी खास पार्टी री ओर ऊं करी जावेला। ईं सागे ई मतदान प्रक्रिया ने इको-फ्रेंडली बणावण सारू ई कार्ययोजना तैयार करी ज्यी है। बाड़मेर ज़िला मांय थावर ने मतदाता सूचियां रा विशेष संक्षिप्त पुनरीक्षण कार्यक्रम रा तहत वार्ड अर ग्राम सभावां राख्यी ज्यी। ईं दौरान ज़िला अर ब्लॉक स्तर रा अहलकार वोट देवण वाळां ने चुनाव प्रक्रिया रा न्यारा-न्यारा पहलुआं री जाणकारी दीरीजी अर वोट देवण रा पात्र लोगां ऊं मौक़े ई अर्जियां लीरीजी। ग्राम सभावां मांय वोटर हैल्पलाइन, चुनावी पाठशाला, मतदाता सेवा पोर्टल, 85 साल या बत्ती उम्र वाळां अर विशेष योग्यजन सारू घर ऊं वोट देवण रा सुबीता रा बारा मांय जाणकारी दीरीजी।