राज्य रा सात विधानसभा हलकां मांय व्हेवण वाळा उपचुनाव सारू प्रचार रो काम लगातार ज़ोर पकड़ रह्यो है। उपचुनाव मांय कुल 69 उम्मीदवार मैदान मांय है। कांग्रेस अर भाजपा सगळी सात सीटां माथे उम्मीदवार उतार्या है, जदके खींवसर मांय आरएलपी अर चौरासी मांय भारत ट्राइबल पार्टी रा उम्मीदवार ई अ सीटां ओजू जीतण बाबत् जोर लगा रह्या है। भाजपा री ओर ऊं उपमुख्यमंत्री दिया कुमारी अर आला नेता सतीश पूनिया समेत 17 नेता बुधवार ने न्यारी-न्यारी ठोडां जनसभा कीनी। दूजी कानी कांग्रेस रा नेता सचिन पायलट, विधानसभा मांय विपख रा नेता टीकाराम जूली अर पार्टी रा दूजा आला नेता ई प्रचार मांय लाग्योड़ा है। उपचुनाव बाबत् प्रशासन ई सगळी जरूरी तैयारियां कर रह्यो है। मुख्य निर्वाचन अधिकारी नवीन महाजन बुधवार ने झुंझुनूं रो दौरो कीनो। वे अहलकारां सागे मीटिंग कर र हलका मांय व्हेवण वाळा उपचुणाव ऊं जुड़ी तैयारियां रो जायज़ो लीनो। मीटिंग मांय अहलकार बतायो के पुलिस अर प्रशासन हाल तांई 10 करोड़ रुप्या ऊं बत्ता मोल री गैर-कानूनी नगदी, सोनो अर शराब ज़ब्त कीना है। ईं बीचे झुंझुनू मांय स्वीप कार्यक्रम रा तहत दिव्यांग मतदाता जागरूकता रैली निकाळी। जे.पी. जानू स्कूल ऊं नेहरू पार्क तांई निकाळी ज्यी रैली मांय दिव्यांगजन नारा मांड्योड़ी पट्टियां अर बैनर रे ज़रिए मतदातावां ऊं वोट ज़रुर देवण री अपील कीनी। सलूम्बर मांय सतरंगी सप्ताह रा तैत पंचायत समिति सराड़ा रा परिसर ऊं सर्विस वोटर अर सरकारी कर्मचारी रैली निकाळी। टोंक जिला रा देवली-उनियारा निर्वाचन हलका मांय घर ऊं वोट देवण री प्रक्रिया रा तीजा दिन बुधवार ने देवली रा नासिरदा गांव री रेहवासी 87 साल री दाखी देवी अर 86 साल रा श्योकरण समेत बुजुर्ग अर दिव्यांग मतदाता पूरा उमाव सागे वोट दीना। दूजी कानी दौसा मांय पात्र मतदातावां कानी ऊं घर ऊं वोट देवण री प्रक्रिया रो पैलो दौर बुधवार ने सरू व्ह्यो। म्हाणा खबरनवीस बतायो के ईं दौर रा तैत बुधवार ने निर्वाचन विभाग री टीमां पात्र मतदातावां रा घर जा र वोट डलवाया अर ओ काम गुरूवार ने ई चालेला।