प्रदेश री सात विधानसभा सीटां माथे व्हे रह्या उपचुनाव सारू प्रचार तेज व्हे ग्यो है। भाजपा अर कांग्रेस रा केई नेता सोमवार ने पार्टी प्रत्याशियां सारू प्रचार कीनो। भाजपा नेता अर उप मुख्यमंत्री दिया कुमारी टोंक जिला रा दूनी मांय देवली-उनियारा ऊं भाजपा रा उम्मीदवार रा चुनाव कार्यालय रो उद्घाटन कीनो। भाजपा नेता अर मंत्री किरोड़ी लाल मीणा दौसा विधानसभा क्षेत्र रा न्यारा-न्यारा गांवां रो दौरो कर र पार्टी रा उम्मीदवार सारू प्रचार कर्यो। राज्य सरकार रा केई मंत्री अर पदाधिकारी ई भाजपा प्रत्याशियां रा चुनाव प्रचार मांय जुट्योडा है। कांग्रेस नेता सचिन पायलट ई दौसा ऊं कांग्रेस रा उम्मीदवार दीन दयाल बैरवा रा समर्थन मांय भांडारेज, मेडोली, कोर्रा समेत केई गांवां मांय जनसंपर्क कीनो। खींवसर मांय आरएलपी नेता हनुमान बेनीवाल ई पार्टी रा उम्मीदवार रा चुनाव प्रचार मांय लाग्योडा है। राज्य री सात विधानसभा सीटां रा उप चुनाव सारू सोमवार ने ऊं दिव्यांग मतदातावां अर बुजुर्गां सारू घर ऊं वोट देवण री सुविधा सरू करीजी है। पात्र दिव्यांग मतदाता अर 85 साल ऊं बत्ती उम्र रा बुजुर्ग 10 नवम्बर तांई घर ऊं वोट दे सकेला। ईं सुविधा सारू 3 हजार ऊं बत्ता पात्र मतदाता अर्जियां दीनी है। आं मांय 2 हजार 365 बुजुर्ग अर 828 दिव्यांग मतदाता शामिल है। निर्वाचन विभाग री ओर ऊं होम वोटिंग सारू कुल 87 टीमां बणाई ज्यी है। झुंझुनूं विधानसभा हलका मांय नयासर निवासी 100 साल री बुजुर्ग महिला राबिया बानो घर ऊं वोट दीनो। ईं हलका ऊं 585 पात्र मतदाता ईं सुविधा सारू नाम मंडाया है। डूंगरपुर रा चौरासी मांय 85 साल री बुजुर्ग महिला धापू मतदान कीनो। वठे 319 बुजुर्ग अर दिव्यांग मतदाता होम वोटिंग सारू पंजीकरण करवायो है। सलूम्बर मांय होम वोटिंग सारू 12 समर्पित मतदान दल बणायी ज्या है। जिला मांय 683 मतदाता घर ऊं वोट डालबा री सुविधा सारू पंजीकरण करायो है। दौसा मांय 6 नवम्बर ऊं होम वोटिंग री सरूआत व्हेला। रामगढ़, दौसा, देवली-उनियारा, झुंझुनूं, खींवसर, सलूम्बर अर चौरासी विधानसभा हलकां मांय 30 अक्टूबर ने फौजियां ने मतपत्र जारी व्हेवण सागे ई मतदान री औपचारिक सरूआत व्हे ग्यी ही। अ मतपत्र 23 नवम्बर ने मतगणना सरू व्हेवण ऊं पैली तांई स्वीकार व्हेला। आं हलकां मांय 13 नवम्बर ने ईवीएम रे जरिए वोट पड़ेला। वोटां री गिणती 23 नवम्बर ने करी जावेला।
आं सात सीटां माथे आसान मतदान सारू प्रशासनिक तैयारियां ई जारी है। डूंगरपुर जिला रा चौरासी विधानसभा हलका सारू नियुक्त सामान्य प्रेक्षक के. विवेकानंदन उपचुनाव बाबत् बणायी ज्या एकीकृत नियंत्रण कक्ष रो दौरो कीनो। वे सोशल मीडिया माथे हेट स्पीच अर भ्रामक कंटेंट परां सतत निगरानी राखण रा निर्देश दिया। वे डूंगरपुर एसपीबी कॉलेज मांय स्ट्राँग रूम, मतदान दलां री रवानगी ऊं पैली प्रशिक्षण स्थल अर मतगणना स्थल री व्यवस्थावां रो ई जायजो लीनो। प्रदेश मांय सात सीटां माथे व्हे रह्या उप चुनाव बीचे नागौर रा पूर्व जिला कांग्रेस अध्यक्ष सुखवीर सिंह चौधरी समेत 14 नेता भाजपा री सदस्यता ग्रहण कर लीनी। भाजपा रा प्रदेश कार्यालय मांय प्रदेश अध्यक्ष मदन राठौड़ अर प्रदेश उपाध्यक्ष ज्योति मिर्धा री मौजूदगी मांय नागौर री राजनीति मांय सक्रिय भूमिका निभावण वाळा कांग्रेस रा पूर्व जिलाध्यक्ष सुखवीर सिंह चौधरी सरपंच, जिला परिषद सदस्य, पूर्व सदस्यां सागे भाजपा परिवार री सदस्यता ग्रहण कीनी। ईं रे अलावा सवाईमाधोपुर ऊं पार्षद असीम खां ई भाजपा री सदस्यता लीनी। ई मौके श्री राठौड़ कह्यो के प्रधानमंत्री नरेंद्र मोदी रा नेतृत्व मांय आज आमजन भाजपा री रीति अर नीति मांय विश्वास जता रह्यो है, जदके कांग्रेस री गलत नीतियां रा चालता वां रो मूल कार्यकर्ता पार्टी ऊं दूर व्हे रह्यो है।