राज्य रा 309 शहरी निकायां अर 41 ज़िला परिषदां रा अध्यक्ष ओहदा रा आरक्षण री लाॅटरी गुरूवार ने निकाळी ज्यी। स्वायत्त शासन विभाग री ओर ऊं निकाळी ज्यी लाॅटरी प्रक्रिया सागे ई आवता स्थानीय निकाय चुनाव ऊं जुड़ी स्थिति साफ व्हे ग्यी है। स्वायत्त शासन मंत्री झाबर सिंह खर्रा री मौजूदगी मांय जयपुर मांय निकाळी ज्यी लाॅटरी रे मुजब 309 शहरी निकायां मांय 50 ओहदा अनुसूचित जाति, 11 जनजाति अर 60 अन्य पिछड़ा वर्ग सारु आरक्षित राख्यी ज्यी है। 188 निकायां रा प्रमुख ओहदा आरक्षित नी राख्यी ज्या है अर वठे किण ई तबका रो उम्मीदवार चुणाव लड़ सकेला। जयपुर, जोधपुर, उदयपुर अर बीकानेर नगर निगम मांय महापौर रो ओहदो अनारक्षित राख्यी ज्यो है। कोटा नगर निगम रा मेयर ओहदा सारू अन्य पिछड़ा वर्ग री महिला उम्मीदवार ई चुणाव लड़ सकेला। नुवा बणायी ज्या नगर निगम भीलवाड़ा, अलवर अर पाली सागे अजमेर अर भरतपुर मांय महापौर ओहदा सारू अनारक्षित वर्ग री महिला ई चुणाव लड़ सकेला। स्वायत्त शासन मंत्री झाबर सिंह खर्रा खबरनवीसां ने बतायो के समय री कमी रे बावजूद ओ काम बेगो ऊं बेगो पूरो करण री कोशिश करीजी है। प्रमुख शासन सचिव रवि जैन बतायो के ईं दफा आरक्षण तय करण मांय साफ-सुथरी प्रक्रिया अर रोटेशन फाॅर्मूला रो खास ध्यान राख्यी ज्यो। निकाय प्रमुख ओहदा रा आरक्षण पाछे अब 17 अगस्त ने वाॅर्डां रा आरक्षण री लाॅटरी निकाळी जावेला। ज़िलां मांय नगर निगम, नगर परिषद अर नगर पालिकावां रा वाॅर्डां रो आरक्षण जिला कलेक्टर रा लेवल माथे कर्यो जावेला।