प्रदेश रा सात विधानसभा हलकां- झुंझुनू, रामगढ़, दौसा, देवली-उनियारा, खींवसर, सलूम्बर अर चौरासी मांय उपचुनाव मांय पड़्या वोटां री थावर ने गिणती करी जावेला। मुख्य निर्वाचन अधिकारी नवीन महाजन बतायो के गिणती संवारे 8 बज्यां सरू करी जावेला। वे बतायो के 98 टेबलां माथे ईवीएम मांय पड़्या वोटां री गिणती करी जावेला जद के डाक मतपत्रां री गिणती सारू 39 टेबलां लगायी ज्यी है। मुख्य निर्वाचन अधिकारी बतायो के गिणती री ठौड़ां सीसी.टी.वी. कवरेज अर वीडियोग्राफी री व्यवस्था करी ज्यी है। मीडिया सेंटर मांय मोटी टी.वी. स्क्रीन माथे मतगणना रा रुझान अर नतीजां री जाणकारी दी जावेला। ईं सागे ई मुख्य निर्वाचन अधिकारी रा दफ्तर री वेबसाइट अर निर्वाचन आयोग रा मोबाइल एप ’वोटर हेल्पलाइन’ माथे ई गिणती रा रूझान अर नतीजां री जाणकारी करी जा सकेला। खींवसर विधानसभा हलका मांय पड़्या वोटां री गिणती नागौर रा लॉ कॉलेज मांय करी जावेला। ईं सारू करीब 100 कर्मचारियां री ड्यूटी लगायी ज्यी है। चौरासी विधानसभा हलका री मतगणना डूंगरपुर रा श्रीभोगीलाल पंड्या राजकीय महाविद्यालय मांय व्हेला, जद के झुंझुनूं री मतगणना शहर रा सेठ मोती लाल पी.जी. कॉलेज मांय करी जावेला। देवली-उनियारा विधानसभा सीट री मतगणना टोंक रा सरकारी पीजी कॉलेज मांय व्हेला। दौसा मांय वोटां री गिणती रे दौरान 700 सुरक्षाकर्मी तैनात कर्या जावेला।