प्रदेश री 7 विधानसभा सीटां माथे उप-चुनाव सारू बुधवार ने संवारे 7 ऊं सिंज्यां 6 बज्यां तांई वोट पड़ेला। ईं सारू सगळी जरूरी तैयारियां पूरी व्हे ग्यी है। मुख्य निर्वाचन अधिकारी नवीन महाजन मंगलवार ने प्रशासन अर पुलिस रा अहलकारां सागे मीटिंग कर र सरहदी हलकां मांय खास सावचेती राखण समेत जरूरी हुकम दीना। मंगलवार ने आखिरी दौर री सिखावण पाछे मतदान दल रवाना व्ह्या। दौसा, रामगढ, झुंझुनूं, देवली-उनियारा, खींवसर, सलूंबर अर चौरासी विधानसभा हलकां मांय व्हेवण वाळा उप-चुनाव सारू 1 हजार 915 मतदान केन्द्र बणायी ज्या है, ज्यां माथे 19 लाख 36 हजार ऊं बत्ता मतदाता वोट दे सकेला। 1 हजार 170 मतदान केन्द्रां माथे वोट देवण रा काम री लाइव वेबकास्टिंग करी जावेला। स्वतंत्र, निपख अर बिना डर चुनाव प्रक्रिया पूरी करावण सारू 9 हजार ऊं बत्ता सुरक्षा कर्मचारी तैनात करी ज्या है। नागौर रा जिला निर्वाचन अधिकारी अरूण कुमार पुरोहित बतायो के खींवसर निर्वाचन क्षेत्र मांय बणायी ज्या 268 मतदान केन्द्रां सारू राजकीय विधि महाविद्यालय ऊं पोलिंग पार्टियां ने रवाना करीजी। टोंक जिला रा देवली-उनियारा विधानसभा हलका मांय व्हेवण वाळा मतदान सारु राजकीय स्नातकोत्तर महाविद्यालय ऊं मतदान दल रवाना व्ह्या। डूंगरपुर रा चौरासी विधानसभा हलका मांय उप-चुणाव सारु भोगीलाल पंड्या राजकीय महाविद्यालय ऊं मतदान दल रवाना करी ज्या। जिला कलेक्टर अंकित कुमार सिंह चौरासी विधानसभा हलका रा मतदातावां ऊं बत्ती ऊं बत्ती तादाद मांय वोट देवण सारु जावण री अपील कीनी है।