प्रदेश रा सात विधानसभा हलकां झुंझुनू, देवली, खींवसर, दौसा, चौरासी, रामगढ़ अर सलूंबर मांय 13 नवंबर ने व्हेवण वाळा उप-चुनाव सारू अधिसूचना जारी कर दीरीजी है। ईं सागे ई नामपाना दाखिल करण रो काम सरू व्हे ग्यो है। उम्मीदवार 25 अक्टूबर तांई पर्चा दाखिल कर सकेला। पर्चां री जांच 28 अक्टूबर ने करी जावेला। उम्मीदवार 30 अक्टूबर तांई नाम पाछा ले सकेला। उप उपचुनाव सारू पड़बा वाळा वोटां री 23 नवंबर ने गिणती व्हेला। मुख्य निर्वाचन अधिकारी नवीन महाजन बतायो के आं हलकां मांय व्हेवण वाळा विधानसभा उपचुनाव मांय 19 लाख 36 हजार ऊं बत्ता मतदाता वोट देवण रो हक इस्तेमाल कर सकेला। मुख्य निर्वाचन अधिकारी बतायो के ईं सारू आं 7 विधानसभा हलकां मांय 1 हजार 862 मतदान केंद्र अर 53 सहायक मतदान केंद्र बणाया जावेला। वे बतायो के चुनाव लड़बा वाळा सगळा उम्मीदवारां अर सियासी पार्टियां ने वां री बेबसाइट, टीवी चैनल्स, राष्ट्रीय अर स्थानीय अखबारां मांय उम्मीदवार रो आपराधिक रिकॉर्ड व्हेवण रा हालात मांय कम ऊं कम तीन दफा इण री जाणकारी देवणी व्हेला। विधानसभा उप चुणाव रा ऐलाण सागे ई राज्य मांय सियासी हलचल ई तेज व्हेवण लागी है। राज्य रा पैली वाळी मुख्यमंत्री अशोक गहलोत कह्यो के दूजी पार्टियां सागे गठबंधन रा बारा मांय फैसलो हाईकमान करेला। वे कह्यो के कांग्रेस पार्टी आं उप चुनाव मांय जीत दर्ज करेला। दूजी कानी भाजपा रा प्रदेश अध्यक्ष मदन राठौड़ शुक्रवार ने जयपुर मांय कह्यो के जिताऊ उम्मीदवारां ने पार्टी रा टिकट दिया जावेला। वे कांग्रेस माथे लोकसभा चुनाव रे दौरान आरक्षण खत्म करण रो भ्रम फैला र मतदातावां ने गुमराह करण रो आरोप माण्ड्यो। वे कह्यो के जनता मांय अब वो भ्रम खत्म व्हे ग्यो है। उपचुणाव वाळा सगळा हलकां मांय प्रशासनिक तैयारियां ई जोर पकड लीनो है। मुख्य निर्वाचन अधिकारी नवीन महाजन दौसा रा अहलकारां सागे मीटिंग कर र जरूरी हुकम दीना। डूंगरपुर रा जिला निर्वाचन अधिकारी अंकित कुमार सिंह शुक्रवार ने चौरासी विधानसभा हलका मांय व्हेवण वाळा उपचुणाव रा बारा मांय अहलकारां सागे मीटिंग कर र पोलिंग पार्टियां री रवानगी अर ईवीएम स्ट्रॉन्ग रूम व्यवस्था रो जायजो लीनो।