प्रदेश रा न्यारा-न्यारा ज़िलां मांय शुक्रवार ने ‘‘स्वच्छ भारत स्वस्थ भारत’’ थीम माथे फिट इण्डिया फ्रीडम रन 5.0 राख्यी ज्यी।झालावाड़ मांय मिनी सचिवालय ऊं सरू व्हे र मंगलपुरा टेक, घण्टाघर चौराहा अर निर्भय सिंह सर्किल व्हेती थकी पाछी मिनी सचिवालय पूगी। ईं दौरान सगळां ने साफ-सफाई राखण री सौगंध दिरायी ज्यी। जोधपुर मांय संसदीय कार्य मंत्री जोगाराम पटेल उम्मेद स्टेडियम ऊं दौड़ ने हरी झंडी बता र रवाना कीनी। ईं मौके संसदीय कार्य मंत्री कह्यो के सगळां ने साफ अर फिट इंडिया बणावण रो संकल्प ले र साफ अर स्वस्थ समाज बणावणो व्हेला। बाड़मेर मांय मल्लीनाथ चौराहा ऊं हाई स्कूल तांई एकता दौड़ राख्यी ज्यी। ज़िला प्रमुख महेन्द्र चौधरी एकता दौड़ ने हरी झंडी बता र रवाना कीनी। सवाईमाधोपुर मांय स्वच्छता अर स्वास्थ्य थीम माथे राख्यी ज्यी फिट-इंडिया मैराथन ने जिला प्रमुख सुदामा मीणा हरी झंडी बता र रवाना कीनी। मैराथन मांय स्कूली विद्यार्थी, खिलाड़ी, जनता रा नुमाइन्दा, अहलकार, कर्मचारी, अर जनता सिरकत कीनी। हनुमानगढ़ मांय जिला कलेक्टर कानाराम दौड़ ने हरी झण्डी बता र रवाना कीनी। ईं मौके जिला कलेक्टर स्वस्थ ज़िन्दगी जीवण अर नशो नी करण री शपथ दिरायी। प्रतापगढ मांय राख्यी ज्यी फ्रीडम रन मांय विद्यार्थीं, अहलकार अर पुलिस रा जवान सिरकत कीनी।