प्रदेश रा न्यारा-न्यारा जिला मांय विज्ञान मेळा लगाया जा रह्या है।
पाली मांय लडकियां री सरकारी स्कूल मांय मंगलवार ने सीनियर वर्ग मांय मॉडल बणावण री होड़ राख्यी ज्यी। होड़ मांय भोजन, स्वास्थ्य अर सफाई, परिवहन अर संचार, कुदरती खेती, आपदा प्रबंधन, कचरा प्रबंधन अर संसाधन प्रबंधन ऊं जुड्या मॉडल रो दरसाव करी ज्यो। जूनियर वर्ग मांय विज्ञान रा बारा मांय प्रश्नोत्तरी री होड़ राख्यी ज्यी अर मोटा अनाज रा बारा मांय सेमिनार व्ही। बाड़मेर ज़िला रा गुढ़ामलानी मांय चाल रह्या विज्ञान मेळा मांय बाल वैज्ञानिक चंद्रयान-थ्री अर कुदरती खेती सरीखा मुद्दा माथे मॉडल बणाया। विज्ञान मेळा मांय दृष्टि बाधित दिव्यांग विद्यार्थी न्यारी-न्यारी अड़चनां री सेंसर री मदद ऊं पैली जाणकारी हासिल करण अर चंद्रयान-3 छोडबा ऊं जुड्यो मॉडल ई बतायो। सवाईमाधोपुर री सरकारी सीनियर सैकेण्डरी स्कूल शहर मांय चाल रह्या ज़िला स्तर रा विज्ञान मेळा मांय ई शरीर स्वास्थ्य विज्ञान, पर्यावरण, खेती-बाड़ी अर अंतरिक्ष समेत न्यारा-न्यारा मुद्दां माथे आधारित मॉडल रो दरसावा करी ज्यो, जिण मांय मोटी तादाद मांय विद्यार्थी सिरकत कीनी। तीन दिन रा ऐ मेळा काल पूरा व्हेला।