प्रदेश रा तापमान मांय उतार-चढ़ाव बीचे केई ठौड़ां पारो सामान्य ऊं नीचे चाल रह्यो है। अजमेर, सीकर, कोटा अर जोधपुर समेत केई ठौड़ां रात री बगत तापमान सामान्य ऊं नीचे दर्ज करी ज्यो। सिरोही ज़िला रा माउंट आबू मांय सब ऊं कम 6 दशमलव 4 डिग्री सेल्सियस तापमान दर्ज करी ज्यो। तेज ठण्ड ऊं वठे लोग सर्दी ऊं बचाव सारू गर्म कपड़ा अर अलाव काम लेवण लाग्या है। राज्य रा मैदानी हलकां मांय मंगलवार ने ई सीकर ज़िला रो फतेहपुर सब ऊं ठण्डो रह्यो जठे न्यूनतम तापमान 8 दशमलव 2 डिग्री सेल्सियस रिकॉर्ड करी ज्यो। राजधानी जयपुर मांय ई न्यूनतम तापमान सोमवार रे मुकाबले डोढ़ डिग्री सेल्सियस उतर र साढे़ 13 डिग्री सेल्सियस नापी ज्यो।