प्रदेश रा घणखर हलकां मांह बिरखा रा दौर मंदो पड ग्यो है हालांकि ऊगणी हलका मांय चौखो मेह बरस्यो है। आं हलकां मांय लारला तीन दिन ऊं व्हे रही लगातार बारिश रे कारण हाल ई कई ठोडा पाणी भर्योडो है। धौलपुर जिला मांय चंबल नदी खतरा रा निशाण ऊं महज साढ़े तीन मीटर नीचे बह रही है। नदी मांय पाणी रो लेवल बधबा रे कारण ईं रा आरे सारे रा हलकां मांय जनता ने सावचेत कर दीरीजी है अर एनडीआरएफ अर एसडीआरएफ री टीमां तैनात करी ज्यी है। पाली रा सांसद अर पैली वाळा केन्द्रीय मंत्री पी.पी. चौधरी आज जोधपुर ग्रामीण ज़िला रा बिलाड़ा मांय जसवंत सागर बंधा माथे चाल रही चादर दी अर अहलकारां ने ज़रुरी हुकम दीना। ईं बीचे सवाईमाधोपुर ज़िला मांय काल व्ही जोरदार बिरखा पाछे आज मौसम साफ रह्यो। शहर रा नीचला हलकां मांय हाल ई पाणी भर्योडो है। जयपुर मांय ई आज मौसम साफ रह्यो। हालांकि आखा दिन बादळा मंड्या रह्या। मौसम विभाग शुक्रवार ने कोटा, भरतपुर, अजमेर, उदयपुर अर जयपुर संभाग मांय कठे-कठे बिरखा रा आसार जताया है। भरतपुर संभाग मांय कठे-कठे 30 ऊं 40 किलोमीटर प्रति घंटा री रफ्तार ऊं बायरो बाजण रा आसार है। जोधपुर संभाग मांय कठे-कठे बिरखा व्हेवण री संभावना है।