प्रदेश मांय घणखर ठौड़ां चौमासा री बिरखा व्हे रही है। मौसम विभाग मंगलवार ने बांसवाड़ा, बारां, भीलवाड़ा, बूंदी अर चित्तौड़गढ़ समेत 12 ज़िलां मांय बरसात रो ऑरेंज अलर्ट बतायो है। अजमेर, अलवर, जयपुर, झुंझुनूं अर जोधपुर समेत 27 ज़िला सारू येलो अलर्ट जारी करी ज्यो है। आवता दो-तीन दिन मझला ऊं तेज़ दर्जा री बिरखा रा आसार है। सोमवार ने कोटा, उदयपुर अर अजमेर संभाग मांय कठे-कठे भारी ऊं घणी भारी बारिश री संभावना है। ईं बीचे सोमवार ने सलूम्बर ज़िला रा केई हलकां मांय रुक-रुक र बरसात रो सिलसिलो चाल्यो। बारां मांय संवारे ई हल्की बारिश सरू व्हे ग्यी। दोपहरां पाछे करीब पौन घंटा तांई झमाझम मेह बरस्यो। झालावाड़ मांय कालीसिंध नदी उफण रही है, जिण ऊं नौनेरा बंधा मांय तेज़ी ऊं पाणी आ रह्यो है। प्रशासन एहतियात राखता थकां जनता ऊं सुरक्षित ठौड़ां जावण री अपील कीनी है। जल संसाधन महकमा रे मुजब 1 जून ऊं हाल तांई राज्य मांय व्ही बिरखा सामान्य ऊं करीब 10-12 फीसदी कम है। 8 ज़िलां मांय घणी ज़ोरदार, 14 मांय सामान्य अर 19 ज़िलां मांय सामान्य ऊं कम बिरखा व्ही। राज्य रा छोटा-मोटा 693 बंधां मांय ऊं 454 थोड़ा-घणा भर ग्या है, 223 रीता है, जदके केवल 16 बंधा पूरा भर्या है।