प्रदेश रा खान हलका मांय 45 हजार करोड़ रूप्या ऊं बत्ता रा निवेश प्रस्तावां सारू करार माथे सही करी ज्यी है। 8 नवंबर ने जयपुर मांय व्हेवण वाळी प्री समिट मांय खान हलका मांय 50 हजार करोड़ रूप्या ऊं बत्ता मोल रा निवेश रा करार माथे सही करी जावेला। खान अर पेट्रोलियम विभाग रा प्रमुख शासन सचिव टी. रविकान्त आ जाणकारी दीनी। उदयपुर मांय खान हलका रा नुमाइन्दा सागे बातचीत करता थकां रविकांत कह्यो के राज्य सरकार खान हलका ऊं जुड्या लोगां री व्यावहारिक राय ने ध्यान राखता थकां बेगी ई नुवी खनन नीति लावेला। ईं बीचे जयपुर ग्रामीण अर दूदू जिलां रो जिला स्तर रो निवेशक सम्मेलन 8 नवंबर ने जयपुर मांय राख्यो जावेला। इण री तैयारियां रो जायजो लेवण सारू शुक्रवार ने जयपुर रा ज़िला कलेक्टर रा दफ्तर मांय संबंधित महकमां रा अहलकारां री मीटिंग राख्यी ज्यी। मीटिंग मांय जिला कलेक्टर डॉ. जितेन्द्र कुमार सोनी अहलकारां ने जरूरी हुकम दीना। वे अहलकारां ने कारोबारियां सागे संपर्क कर र वां ऊं बत्ता ऊं बत्ता निवेश बाबत् अरज करण सारू कह्यो। राइजिंग राजस्थान ग्लोबल इन्वेस्टमेंट समिट 2024 रा तैत सीकर मांय 23 अक्टूबर ने जिला स्तर रो निवेशक सम्मेलन व्हेला। जिला कलेक्टर मुकुल शर्मा खबरनवीसां ने बतायो के जिला मांय हाल तांई 81 करार रा बारा मांय सहमति बणी है ज्यां रे जरिये 1 हजार 244 करोड़ रूप्या रा निवेश सागे 2 हजार ऊं बत्ता लोगां ने नौकरी-धंधा रा मौका मिलण रा आसार है। सीकर मांय राइजिंग राजस्थान ग्लोबल इन्वेस्टमेंट समिट रा तैत जिला स्तर रो निवेशक सम्मेलन 23 अक्टूबर ने राख्यो जावेला। जिला कलेक्टर मुकुल शर्मा बतायो के हाल तांई 81 करार बाबत् सहमति बणी है, ज्यां रा तैत 1 हज़ार 244 करोड़ रुप्या रा निवेश ऊं करीब अढ़ाई हज़ार लोगां ने नौकरी-धंधा रा मौका मिलेला। झालावाड़ मांय ई 21 अक्टूबर ने जिला स्तर री राइजिंग राजस्थान इन्वेस्टर मीट राख्यी जावेला।नगरीय विकास अर स्वायत्त शासन राज्यमंत्री झाबर सिंह खर्रा कह्यो है के राज्य सरकार जनता री परेशानियां रा निपटारा सारू पूरी प्रतिबद्धता अर समर्पण भाव सागे काम कर रही है। शुक्रवार ने जोधपुर मांय जनसुणवाई कर र अहलकारां ने जरूरी हुकम दीना। जनसुणवाई सारू मोटी तादाद मांय जोधपुर अर आरे-सारे री जनता पूगी।