प्रदेश मांय 2 अगस्त तांई चैमासा री चोखी बिरखा रा आसार है। मौसम विभाग काल 29 ज़िलां मांय बारिश रो येलो अलर्ट जारी कीनो है। ईं दौरान कठे-कठे ज़ोरदार बायरो बाजण रा ई आसार है। जोधपुर संभाग रे अलावा दूजी सगळी ठौड़ा मझला ऊँ तेज दर्जा री बरसात री संभावना है। ईं बीचे मंगलवार ने राजधानी जयपुर रा न्यारा-न्यारा हलकां मांय दोपहरां पाछे पाणी बरस्यो। सवाईमाधोपुर ज़िला अर आरे-सारे रा हलकां मांय ई हल्की ऊँ मझला दर्जा री बरसात व्ही। तेज़ गर्मी अर उमस पाछे मंगलवार ने चूरू मांय ई चोखो मेह बरस्यो। दूजी कानी सिरोही मांय आखा दिन रिमझिम बारिश व्ही। आबूराज मांय डूंगरियां माथे धुंध छाई रही अर मौसम सुहावणो बण्यो रह्यो। दूजी कानी हनुमानगढ़ अर भीलवाड़ा मांय उमस अर गर्मी ऊँ लोग परेशान रह्या।