प्रदेश मांय ज़ोरदार ठण्ड पड़बा लागी है। शेखावाटी हलका अर उतराद जिलां समेत केई ठौडां़ शीतलहर ऊं जिन्दगी माथे घणो असर पड़ रह्यो है। सीकर ज़िला रा फतेहपुर मांय थावर ने लगातार चौथा दिन रात री बगत पारो शून्य ऊं नीचे दर्ज करी ज्यो। म्हाणा खबरनवीस बतायो के वठे आज ईं सिंयाळा रो सब ऊं सीळो दिन रह्यो। प्रदेश मांय न्यूनतम तापमान औसतन 10 डिग्री सेल्सियस ऊं नीचे उतर ग्यो है। 10 ठौड़ां रात री बगत पारो 5 डिग्री सेल्सियस ऊं ई कम दर्ज करी ज्यो। जयपुर मांय ई बीती रात ईं रूत रो सब ऊं कम न्यूनतम तापमान दर्ज करी ज्यो। मौसम विभाग आवता चार-पांच दिन शीतलहर रा हालात बण्या रहवण रा आसार जताया है।